ORANJESTAD (AAN): Pa di 3 aña consecutivo, ta bai decora centro di ciudad, pero e aña aki lo ta mas grandi cu nunca!
Durante un conferencia Minister Geoffrey Wever a anuncia Fiesta di Luz 2023, den Oranjestad.
Minister Wever a indica cu varios area rond di centro di ciudad Oranjestad a ricibi luz adicional y decoracion, cual conhuntamente lo contribui den un centro festivo di temporada di pasco y fin di aña. Iluminacion ta importante segun minister Wever. Na banda di e luznan y decoracion di pasco, recientemente a anuncia tambe luznan nobo y adicional pa e area completo, asina contribuyendo na un “sense of security” adicional cual ta sumamente importante pa e comerciante y consumidornan.
Lo cende e luznan di pasco den Oranjestad dia 25 di november pa 6or di atardi. Tur diasabra te cu 23 di december lo tin actividad den y rond di Caya G.F. Betico Croes, hunto cu specials y entretenimento musical pa deleita bishitantenan.
E orarionan pa Fiesta di Luz: Dia 25 november, 6:00 – 8:00 PM, entretenimento: Las Unicas
2 december, 4:00 PM – 6:00 PM, entretenimento: Maruba
9 december, 4:00 PM – 6:00 PM, entretenimento: Las Unicas
16 december, 4:00 PM – 6:00 PM, entretenimento: Rumba Caribeña
23 december, 6:00 – 8:00 PM, entretenimento: Maruba
Kidspreneur$ Bazaar: Riba diasabra 25 di november, como tambe 16 di december lo tin e evento conoci di “Kidspreneur$ Bazaar” na Plaza Daniel Leo, organisa pa departamento di asuntonan economico (DEACI). Aki varios empresarionan hoben lo tin e oportunidad pa ofrece diferente productonan na benta, manera artesania, hoyas, cuminda y bebida y mas. Durante Kidspreneur$ bishitantenan por admira e creatividad di nos hobennan, y alaves sostene nan a traves di compras di nan producto.
Pueblo henter ta cordialmente invita pa pasa desde 25 november proximo di 6:00 PM den centro di Oranjestad, y pasa unrato ameno den ambiente familiar di pasco y fin di aña. Na mes momento ta sostene empresarionan local, y contribui na un ambiente revitalisa di nos centro di ciudad.
