Rotonde Palm Beach ta logra trece mas alivio den trafico

Premier Evelyn Wever - Croes: 

*Tambe lo drecha e camindanan dilanti hotelnan den area ‘highrise’ 

ORANJESTAD (AAN): Fin di siman comunidad cu ta haci uzo di e area di Palm Beach por a experiencia mehoracion den e situacion di trafico. E rotonde di Palm Beach a wordo habri pa trafico por haci uzo di dje. E trabaonan lo finalisa fin di luna, pero ya caba e rotonde ta habri pa trafico di ambos direccion haci uzo di dje.

            Cu e rotonde completa, ta logra trece mas alivio den trafico den e area y specialmente trece seguridad den trafico.

            Prome cu a tuma e decision pa construi un rotonde na e area aki, tabatin un crusada grandi cu tabata hopi insigur. Ta spera cu ciudadanonan cu ta frecuente e area awor por sinti e alivio y ta contento cu esaki, Prome Minister Evelyn Wever - Croes a expresa.

            Prome Minister alabes a informa cu siguientemente lo drecha e camindanan dilanti hotelnan den area ‘highrise’.

            E trabou aki ta inclui den presupuesto pa otro aña pues manera cu presupuesto pasa, e fondonan lo ta disponibel pa por wordo uza.

            Den cuadro di esaki, preparacionnan ta bay cuminsa pronto, incluyendo dialogo cu stakeholders den e area, pa asina trece alivio den e area ey tambe. 

Marlon Croes Director DOW

            Director di DOW a splica cu e crusada cu tabatin antes tabata un punto debil den Aruba su infrastructura. Prome cu a cuminsa cu construccion di e rotonde, a pone plataforma na e sitio como solucion temporal. Awo cu e rotonde ta cla e ‘lane’ parti paden lo wordo cera pa e contratistanan su empleadonan por traha na un manera sigur riba e parti memey di e rotonde y pa 23 di september e proyecto lo ta definitivamente cla.

            Gobierno su prioridad ta pa e careteranan ta sigur y pa aumenta comfortabilidad den bida di cada ciudadano. Ta gradici e contratista cu ta Arubaanse Wegenbouw Maatschappij cu a traha duro hunto cu  ekipo di DOW pa realisa e proyecto.