ORANJESTAD (AAN): Durante e ultimo parada nan di Aruba su Carnaval por a nota cu e miembronan di Rotary Club Aruba tabata ya activo bendiendo ticket pa e grandioso rifa di Fiesta Rotaria 2023.
Tur buki di rifa ta afor y cla pa benta. Manera pa basta aña caba na final di e Fiesta Rotaria ta saca e numbernan ganador pa e rifa. Tur aña tin premionan atractivo na unda bo por gana un di e 14 tremendo premio nan.
E bukinan di rifa ya ta obtenibel serca tur miembro di Rotary Club Aruba. E premio nan ta varia di un auto ultimo modelo 2023 Chevrolet Groove, Tickets Aruba pa Medellin, iPhone 13 y gift certificates di Kooyman, Boolchand’s, Ling & Sons, AMC Unicon, Weekend Stays na Divi Resort Aruba y 6 premio di 500 Florin cash.
Despues di 3 aña di pandemia cu no por a organisa e tremendo Fiesta Rotaria, e aña aki si Rotary Club Aruba ta den full preparacion organisa e popular Fiesta Rotaria pa di 40 aña. Esaki lo tuma lugar ariba diadomingo 2 di april 2023. Fiesta Rotaria ta e evento di mas grandi di Rotary pa recauda fondo. E fondonan aki lo wordo reparti entre diferente fundacionan y organsacion den nos communidad. Kiermen cu cada compra di un rifa abo ta aporta na nos comunidad.
Pa compra di ticket por tuma contact cu cualkier miembro di Rotary Club Aruba of e paginanan social di Rotary Club of Aruba riba Facebook y Instagram.
