Rooinan halto a pone DOW cera varios caminda

ORANJESTAD (AAN): E awacero torencial di Diamars marduga pa mainta,

a bin acompaña no djis cu hopi awa yobiendo for di direccion panort, sino cu rooinan rond di e isla cu a yena rapidamente y inunda cierto zona.

   Algun caminda a wordo afecta severamente door di esaki, y net den e rush-hour di mainta, oficialnan di DOW a dicidi pa cera varios area pa evita cu autonan ta keda pega den dje.

   Aki nan a cera e.o. e caminda cu ta pasa door di Zeewijk.  Tambe a cera e caminda di Pos Chikito, cu ta cerca di Tia Rosa Snackbar.

   Un area di Madiki tambe a wordo cera pa trafico debi cu e nivel di awa tabata stroba autonan cu superficie abao di pasa.

   Tambe a dicidi na cera parti di e paperclip rotonde di Watty Vos Boulevard na Sero Patrishi, cual caminda ta bay pabao direccion rotonde di Tanki Leendert.  Esaki a ocasiona cu trafico a keda basta stagna, y tabatin hasta un Chevrolet Spark color blauw pega den e rooi halto cu a forma riba Watty Vos Boulevard.

   Despues di un ora cu e rooi a sigui su rumbo y cu e nivel di awa a baha normal, a dicidi cu ta bay laga e camindanan aki habri bek.