Stephanie Croes, Managing Director di EduCampus:
*Acuerdo entre institucionnan ta prepara e hobennan
ORANJESTAD (AAN): Universidad di Aruba y EduCampus a anuncia cu nan a cera un acuerdo di colaboracion y relaciona cu esaki, Stephanie Croes, Managing Director di EduCampus a declara cu esaki ta un oportunidad hopi importante pa e hobennan.
El a indica cu tin e convenio aki cu e posibilidad di haci un curso di preparacion den 8 siman. Normalmente un curso asina ta tuma entre 30 cu 36 siman pa nan por caba. Kiermen cu den un tempo relativamente cortico, pero intensivo, e hobennan ta bezig ta desaroya nan habilidadnan, cu den e curiculo di EduCampus no ta haya chens di brinda nan facilmente.
Esaki ta duna e oportunidad pa e studiantenan di EduCampus bay hunto cu studiantenan di Universidad di e prome aña academico (AFY) y forma un grupo. Nan ta traha riba proyectonan y presentacionnan y esaki ta un bunita interaccion, a bisa.
Tabatin mas o menos 45 studiante activo di cual 13 tabata di EduCampus. Tabatin un compromiso hopi halto pa cu e vak cu a wordo duna riba entre otro 'design thinking'. E hobennan tabata masha activo pa bin cu solucionnan.
Aworaki ta ampliando e manera con pa disemina e informacion di nan proyectonan na stakeholders cu ta relevante pa asina nan idea no keda solamente un idea ariba papel, Croes a expresa.
