Luznan blanco y oranje mira ta cay den lama
ORANJESTAD (AAN): E lanzamento di e mega raket ‘Starship’ di e compania SpaceX, for di su base di Boca Chica na parti zuidwest di Texas, a explota riba espacio espacial riba Caribe, y monton di resto di e nave espacial aki a cay den Caribe. Y esaki a wordo mira na e.o. Haiti y tambe na Aruba.
Starship tabatin satelitenan bashi “dummy satellites” cu tabata forma parti di e lanzamento aki cu ta djis un test-flight, di cual seis a wordo haci caba prome.
Y e restonan di e raket cu a desintegra, a wordo mira tambe door di hendenan na Aruba. Mesora a yama Polis pa raporta cu ta mirando luznan color blanco y oranje ta cayendo den lama. Central di Polis mesora a manda patruyanan di Santa Cruz pa mobilisa pa area di Bushiribana y Natural Bridge pa mira kico ta pasando.
Tin unidad di Polis cu a bay subi Sero Cristal tambe, pa tin un bista mas halto di costa panort. Pero pa ora cu Polis a yega, no a mira nada mas. Unidad di Polis di Bario tambe a bay duna un man.
SpaceX a laga sa den un boletin, cu Starship a wordo destrui debi na algo cu a socede di e base di lanzamento caba, ora cu un booster a topa problema. Toch e raket a bay halto y cada rato uno-pa-uno e motornan a keda paga, te ora cu el a perde propulsion y a cuminsa bay abao. E raket tabata den contacto cu base na Boca Chica pa solamente 8½ minuut despues di lanzamento.
