ORANJESTAD (AAN): En conexion cu celebracion di himno y bandera, directiva di Centro di Bario Playa Pabao ta organisa un programa cultural.
E actividad aki ta tuma luga na Centro di Bario Playa Pabao y lo cuminsa pa 12’or pm y lo termina pa 6’or pm. Lo tin presentacion di diferente grupo di baile y solista hubenil. Tambe lo tin un bar y cushina bon surti. Durante e actividad lo tuma luga un homenahe na Roderick Franken cu e aña lo recibi e premio Cultural Playa Pabao 2025.
Kende ta Roderick Franken
Biografía
Rodrick Ronald Franken mihor conoci como Rocco a nace riba un 22 di February na aña 1986.
Rocco ta e yiu mas chikito di Seagrid Ras y Ronald Franken. Rocco a lanta den e bario di Tanki Leendert y cu su 9 aña a bin biba den e bario di Madiki Kavel.
Deporte
Su infancia tabata rondona di musica pero prome cu musica tabata deporte. E la practica e deportenan di baseball, futbol y volleyball. Pero baseball tabata unda e la sobresali mas cu tur. E la practica baseball for di su 5 te cu su 19 aña reperesentando Aruba varios biaha cu seleccion national. Tambe den su añanan bibando na Hulanda Rocco a hunga baseball profesional pa e ekipo di Tornado's di Den Haag pa 2 temporada.
Musica
Su prome experiencia riba escenario tbt cu su 9 aña di edad. Representando su team di baseball den un festival di Ranchera. Y no ta mucho despues cu e la cuminsa participa den festival di tumberito. Durante su participacionnan den e festival di tumberito e la logra gana e titulo maximo 4 biaha (1 infantil, 3 hubenil). Despues a sigui den grandi y a logra e titulo di " Rey di tumba" na 3 ocasion. Te awe Rocco ta e unico cantante pa gana corona den infantil, hubenil y grandi.
Rocco a participa varios biaha na "Festival di Tumba Curaçao". Clasificando den tur ocasion y tambe semper den e finalistanan. 3er finalista na 2014 y 2017 y 4to finalista na 2016 tabata su logro di mas grandi na e dicho festival.
Ganador di " Festival un canto pa Aruba su Himno y Bandera" na aña 2021 y ganador di Aruba su " Groovy Soca Monarch" na aña 2024.
Bandanan musical
Na 2005 e la forma parti di su prome banda musical yama MEGA y despues e banda musical PRIVÉ na 2007. Na 2010 Rocco a bai studia na Hulanda y eynan a bin forma parti di Cache Deluxe cu despues a cambia nomber pa Cache Royale. Siendo den Cache e la gana experiencia biahando y cantando na Alemania, Belgie, Spanje, Aruba, Boneiro y Curaçao y a traha su nomber como cantante den farandula di e Islanan ABC. Na 2014 e la bin bek su Aruba y akinan hunto cu Dwight Leoneta, Jairo Evertsz y Krish Mahtani a dicidi di lanta nan mesun banda musical cu awe ta carga e nomber di "Buleria" cu awe ya tin 10 aña di existencia. Dia 5 di juni 2025 Rocco ta cumpli 30 aña den farandula.
