Aruba dushi tera ta e titulo di e composicion musica cu a bira oficialmente e himno nacional di Aruba.
Ta danki na Sr. Rufo Wever Sr. Padu Lampe dos musico bon conoci ariba nos isla, cu na 1951 a sinti e necesidad pa cuminza conserva y promove locual ta wordo considera di ta e ritmo melodianan tipico di Aruba. Cu e meta aki un mainta na aña 1952 dos musico grandi di Aruba a dicidi di sinta hunto pa traha un cantica. Nan tabata tin custumber di traha hunto caba. Pero e dia ey nan kier a traha un cantica masha special. Un cantica cu ta expresa stimacion di pueblo di Aruba pa su isla. E mesun un dia e pieza a keda cla completo cu letra y musica. Hunto nan a crea “Aruba Dushi Tera”, un wals. Den corto tempo casi tur e muchanan di school tabata sa e cancion, e tabata wordo canta hasta na aubadenan y na ocasionnan oficial di gobierno. Poco poco y espontaneamente otro instancianan priva a cuminza uza Aruba Dushi tera na tur occasion di importancia pa nos pais.
Grabacion di nos himno: E tempo ey no tabata facil pa graba un cancion. Te na aña 1954, un coro di mucha “De Trupialen” a graba “Aruba Dushi Tera” riba disco. Asina e hendenan di Aruba por a tende e cantica na radio.
Pueblo a gusta e cancion y e hendenan a cuminza uza e cancion na ocasionnan oficial. Mas cu binti aña despues Gobierno di Aruba a dicidi cu Aruba mester haya su himno oficial regla pa ley. Kico mas bunita cu duna e honor na e cantica “Aruba Dushi Tera” cu pueblo a acepta y stima pa hopi aña caba.
Aprobacion pa himno: Dia 21 di Januari 1976, Gobierno Insular di Aruba a instala un comision di seis ciudadano prominente y a-politico di comunidad cu e tarea di aconseha Gobierno Insular di Aruba ariba e pregunta cu su preferencia pa haci Aruba Dushi Tera e himno nacional di Aruba ta na su lugar, of no.
Durante un votacion secreto e comision den su totalidad a vota pro pa recomenda Aruba Dushi Tera pa tal fin. Tambe e proposicion pa añadi un couplet mas na e himno cu ta elogia e cordialidad di e pueblo di Aruba y su amor pa libertad, a keda acepta pa e comision. Dia 16 di Maart a agrega un couplet acerca y 2 dia despues dia 18 di Maart nos himno “Aruba Dushi Tera” a rezona oficialmente den Wilhelmina Stadion como nos himno nacional canta pa e coro hubenil bao direccion di Maybelline Arends-Croes acompaña pa Orquesta Filarmonico, dirigi pa Sr. Joy Kock.
Orquesta y coro den 24 ora: Tabata dia 17 di Maart 1976, bispo di inauguracion di nos Himno y bandera alrededor di 6:30’or di atardi cu Sr. Joy Kock ta ricibi un yamada telefonico di Sr. Tico Kuipero q.e.p.d. hefe di protocol di Gobierno di Aruba e temp ey y ta puntra Sr. Kock si pa mañan anochi dia 18 di Maart e Orquesta Filarmonico di Aruba por a toca e himno di Aruba pa prome biaha oficialmente. Joy a contesta Tico cu el a scucha na radio cu ta e coro “Vivons en Chantant” lo tin e honor grandi aki y cu e ta toca tur anochi na Caribbean Hotel pero conta cu aporte.
Tico a splica Joy cu e directiva a laga sa cu nan lo no participa mas pa motibo politico. Joy a priminti di haci tur lo posibel. Despues di 30 minuut Sr. Kock ta haya un yamada di Sr. Fifi Eman q.e.p.d. cu tabata presidente di e comision inauguracion Himno y Bandera cu a yama Joy cu e mesun peticion. Y pa 8’or di anochi Sr. Betico Croes q.e.p.d. mes a yama Joy y splique e mesun asunto, y Sr. Kock a bisa nan pa no worry cu tur cos lo bay bon.
Y tabata dia 18 di Maart 1976 den un solo cayente 3’or di atardi Orquesta Filarmonico bao direccion di Sr. Joy Kock y e coro juvenil bao direccion di Maybelline Arends-Croes a train. Anochi e orquesta mahestuosamente a compaña e coro juvenil dilanti di miles y miles di hende kendenan bao awa na wowo a scucha e himno y mira nos bandera bay halto pa prome biaha oficialmente.
