ORANJESTAD (AAN): Recien por a tuma nota den medionan di comunicacion cu Banco Central di Curaçao y St. Maarten a worde afecta pa un atake cybernetico, esta un “cyber attack”.
Na Aruba tambe nos a worde confronta cu algo similar na Hospital. E consecuencia di e fenomeno aki ta sumamente gandi pa un pais. Un “cyber attack” riba un departamento vital por desbalansa un pais y cu consecuencianan financiero grandi. Importancia di un ICT sigur y “safe” ta mas bisto cu nunca mirando e vision di Gabinete Wever-Croes pa loke ta E-government, desaroyo economico y e dependencia di departamentonan vital riba ICT.
National Cyber Security Taskforce: Mirando e experticio necesario pa por combati y preveni e tipo di criminalidad aki a instala un "task force". E "task force" aki ta consisti di sector publico y priva.
E meta principal ta pa crea seguridad digital na Aruba y yega na un plan nacional pa “cyber security”.
Esaki ta ensera tambe un structura defini con ta actua na momento cu tin un “cyber attack”. Esaki a conduci cu ya caba tin un “letter of intent” firma riba e tereno aki entre Gobierno y stakeholders den sector semi-publico.
Plan Nacional Cyber Security: Un plan nacional lo stimula colaboracion entre sector priva y sector publico pa asina haci Aruba mas resiliente contra e fenomeno aki. Ambos partido tin interes pa cu esaki caminda seguridad nacional y interesnan economico por worde atacha si nos no ta resiliente.
E temporada nos dilanti ta importante pa duna prioridad na formula e plan nacional y percura pa su ehecucion. Asina por sigui fortifica “cyber security” na Aruba, concientisa empleadonan di e sector vital riba “safe use” di ICT, y crea un base huridico pa colaboracion entre e dos sectornan.
Pa garantisa atencion continuo pa e fenomeno aki, un fenomeno cu por cierto ta keda desaroya su mes continuamente, mester cuminsa pensa den direcion di un conseho nacional pa "cyber security”. Tin organizacionnan internacional cu por facilita esaki. Manera entre otro e “Global Forum on Cyber Expertise” cu por asisti den curso y educacion pa haya e experticio necesario y yuda crea structuranan resiliente contra e fenomeno aki.
Pero tambe por percura pa colaboracion cu e “National Cyber Security Centrum” di Hulanda cu ta resorta bou di e Ministerio di Husticia Hulandes, kende tin entre otro e tarea pa duna consehonan den Reino riba e tereno aki.
