KINGSTON: Polis di Jamaica a cuminza cu un investigacion relaciona cu un robo miyonario cu a wordo cometi riba e cerveceria Red Stripe cu tin na e isla den parokia di St. Andrew, y cu a wordo cometi den fin di siman.
Polis ya tin grabacion di Security Video Camera, cu ta indica con Diadomingo entre 1:00 am y 2:00 am, cinco persona bon arma a yega y ataca un Security Guard y despues a mara su curpa completamente.
Nan a kita un boshi yabi for di e Security, y esaki nan a usa pa habri porta pa drenta e tereno di e cerveceria.
E ora e hombernan a drenta cu dos truck riba e tereno aki, y a bay na un deposito unda nan a kibra e candal di e porta pa e edificio.
Polis a bisa cu e trucknan e ora a wordo yena cu un surtido amplio di bebida. Ora cu no tabatin lugar mas riba e trucknan, nan a bandona e lugar.
Polis a bisa cu e alcohol horta tin un balor di 7 miyon Dollar Jamaiquino, cu ta equivalente cu US$ 45.000.
Te ainda ningun hende a wordo aresta. Pero cerveceria Red Stripe a aumenta security na nan lugar despues di e robo grandi aki.
