ORANJESTAD (AAN) – Na John F. Kennedy Education Center, cu ta parti di Departamento di Cultura Aruba, a tuma lugar un conferencia di prensa conduci pa señor Robert Maduro.
Maduro a splica cu e departamento aki ta NGO Coordinator pa loke ta trata DCA, unda nan ta traha cu diferente partners gubernamental y no gubernamental.
Robert Maduro a indica cu traha cu NGO’s ta nifica traha cu diferente artesano, artista y tur esnan cu tin di haber cu arte y cultura na Aruba.
Maduro a expresa cu pa nan tabata un placer pa presenta un produccion di un video di e hoben Jorzinho Croes (titula Ban Cende un Bela), y tambe ta un placer pa e departamento ta partner den e proyecto aki, cu ta uno sumamente bunita, coordina conhuntamente cu un funcionario di CDA cu ta John Freddy Montoya.
Tur e elenco tabata presente pa por a participa den e produccion aki. Nos ta contento cu un hoben manera Jorzinho ta tuma un iniciativa asina, pasobra cultura ta algo bibo, cu ta draai y cu ta keda biba den cada un di nos”, Robert Maduro a expresa.
El a agrega cu cada produccion cu nan ta haci sea den e ramo musical, tarima, baile of cualkier di e disciplinanan di cultura pa DCA ta importante, pasobra cultura ta un desaroyo cu ta anda den pueblo y tine hopi bibo y varia.
Maduro, a felicita Jorzinho pa su tremendo produccion y a desee hopi exito. Tambe a felicita henter e team di e produccion cu ta su tras, ya cu ora di traha un produccion asina e persona no ta su so, pero tin e autor di loke ta e tema, e areglo, e musicalizacion, y di aki bay traha e guion, e filmacion cu tin cu tuma lugar den detaye di tur e produccion y despues e trabao grandi ta cuminza pa loke ta editing, mastering, te ora yega na e producto final.
Den nomber di e director y e personal completo di Departamento di Cultura e reitera palabranan di pabien y danki pa un bon trabao pa e hoben y tur cu a forma parti di e produccion aki.
https://diario.aw/categories/noticia/general/robert-maduro-di-dca-a-presenta-e-produccion-nobo-di-jorzinho-croes-ban-cende-un-bela#sigProIdff0ab61da2