Risico pa fayece na un edad mas jong ta mas grandi cerca esnan no-vacuna

Dos persona mas na Aruba victima mortal di Covid-19 - *Siman a habri cu 43 caso nobo

ORANJESTAD (AAN):   Siman a habri cu noticianan algo positivo mirando cu e casonan ta sigui baha, pero mientrastanto, mas personanan ta sigui fayece door di Covid.

Segun cifranan di dialuna, 50 persona a recupera y un total di 43 caso nobo di COVID-19 a keda registra cual 7 ta no-residente y 36 ta residente.

E cifranan aki ta representa un 'Positivity rate' bou di residentenan di 29%.

E cantidad di casonan activo di COVID-19 ta 561 y cantidad di fayecidonan relaciona cu COVID-19 a aumenta na 139 cu fayecimento di 2 residente. Forsa na famia di e fayecidonan.

 Datonan di COVID ta ilustra casonan nobo cu un average semanal di 64 caso pa dia y un average di 'positivity rate' semanal di 26% pa dia.

Actualmente na Aruba tin 56 persona interna debi na COVID di cual 12 ta den ICU y 44 riba piso general y na Colombia tin actualmente 16 persona den Cuido Intensivo. 

DATONAN: 

For di comienso di juli cu DELTA a haci su introduccion na Aruba por observa cu lamentablemente 32 persona na Aruba a perde e bataya contra e virus di COVID-19.

E edad di esnan cu a fayece apesar di tabata tin 1 of mas vacuna ta varia entre 75 cu 94 aña y e edad di esnan cu a fayece sin cu nan tabata vacuna cu ningun vacuna ta varia entre 46 cu 95 aña indicando cu e risico pa fayece na un edad mas jong ta mas grandi cerca esnan no-vacuna.