Rijnan largo pa haci test di Covid a sigui riba dialuna

Cantidad di auto ta birando mas y mas --- ORANJESTAD (AAN):   Y asina e siman a cuminsa! Atrobe por mira rijnan largo di auto di personanan cu ta acudi pa haci test di Covid na e test center na Hospital.

Esaki a bira caba un asunto inhumano mirando cu tin cu para den rij un te hasta dos ora pa asina por yega na beurt pa tuma e test.

Ta di berdad e momento pa yega na palabracionnan concreto cu AZV riba e posibilidad pa laga laboratorionan priva haci test pa hende local tambe.

Ta un caos sigur locual practicamente tur dia ta wordo mira for di siman pasa. E aumento di personanan cu sintoma como resultado di e fiestanan di fin di aña ta pone cu mas y mas persona ta solicita un cita pa test.

Tin personanan cu ta acudi na tempo, pero pa motivo di e rij largo nan ta cay laat y no por test segun e ora stipula. Pero ta mira cu otro hendenan ta bay na un ora cu no ta stipula strobando esnan cu si tin afspraak prome.

Tin hende cu ta hasta ta birando creativo y na lugar di bay cu auto ta bay test pero na pia.

Corda cu gasolin tampoco ta barata y sigur pa keda para den rij un pa dos ora o mas no ta algo cu ningun hende ta desea. Algun sigur mester wordo haci.