OPPA hopi rabia cu e cambionan di AZV:
ORANJESTAD (AAN) – E presidente di OPPA, Ivo Valdez, a sigui relata den entrevista cu DIARIO, tocante e cambionan di AZV y con esakinan ta afecta e pensionado.
Valdez a señala cu entrante 1 di April AZV a bin cu mas cambio ainda, y tur esakinan por wak nan riba e website di AZV, no obstante e kier a referi na cuater cambio cu ta primordial.
1.E remedinan “over the counter”. Nan no ta paga ningun di nan mas, y e lista ta basta grandi.
- E remedinan prescribi cu no ta wordo cubri. “Anto eynan tin un problema. Ademas cu e remedi no ta wordo cubri, botica ta cobra bo 16.10 florin pa e receta. Desde cuando nos a asegura nos mes cu e botica? Anto nos tin cu paga e botica, siendo cu AZV ta suppose ta paga e botica. Esey ta cabando cu e pensionadonan. No lubida cu nan entrada ta masha abao mes. Pues, pa cada remedi cu no ta wordo paga, botica ta cobra bo 16.10 florin acerca.
3.Tin remedi cu ta cay bao di e lista positivo, riba dje AGA, cu ta esun cu ta controla e lista di remedi ta bisa cu, periodicamente, nan ta bay controla e lista aki.
- Si bo wak e lista bo ta wak solamente e tiponan di malesa, bo no ta wak e remedi. Anto eynan ta bay tin e manipulacion cu nan ta bisa bo cu e no ta cay bao di e lista positivo. Kiermen, mas gasto pa e grandi”, Ivo Valdez a subraya.
OPPA ta protesta pa e asunto aki, Ivo Valdez ta señala. E ta kere cu si e situacion aki sigui asina, Aruba ta bay bira un Aruba no saludable.
“Nan ta compara nos situacion, por ehemplo, cu e ta hopi miho cu na Venezuela. Shonnan, nos no ta biba na Venezuela. Nos ta pagando un prima halto, pa nos tin un calidad di servicio halto tambe, y esey nos kier! Nos ta hayando menos y riba dje nos ta paga mas! Nos, cu ta e pensionadonan cu tin un pension di APFA ta esnan cu ta paga mas prima”, Valdez a acentua.
El a bisa cu OPPA ta canando cada bez e camindanan necesario y na ultimo nan kier a bolbe sinta cu Prome Minister, pero e ta bisa cu e ta manda e puntonan pa e Minister di Salud Publico, y te dia di awe nos no tin chens pa sinta cu ningun hende.
“Cu AZV bo no ta sinta mes mas, pasobra aworaki Covid ta e problema. Covid ta stroba tur hende di reuni. Acaso, si nos kier reuni nos ta reuni virtualmente, anto nos kier sinta cu nan cara cara. Cu e forma virtual berdad nos ta cuida, pero tambe si nos ta sinta leu for di otro, nos por papia. Nos por trece nos puntonan dilanti, pero…atrobe, si nan ta scucha nos”.
Valdez ta punta ta di con cu cada cambio cu bin, ta e grandinan tin cu haya e sota? “Nos ta cansa caba di esey. Kiermen, mi ta haya cu e cos aki no ta husto”, Ivo Valdez, presidente di OPPA a subraya.
NOTA DI REDACCION: E declaracion aki tabata haci prome cu e anuncio di Minister Presidente Evelyn Wever-Croes a haci diabierna unda e ta anuncia cu ta hala atras e pagamento pa remedi cu ta para den e Lista Positivo di Remedi.
