Riba Dia Nacional pa Cuida Aruba! lo tin bakinan di sushi disponible pa  comunidad

Robert Ras di Bureau City Inspector

ORANJESTAD (AAN)-- Den e contexto di e Proyecto Dia Nacional pa Cuida Aruba, Diasabra 25 di Juli awo, lo tin un accion di limpieza cu lo cubri henter nos Isla, for di 7 or di mainta te 2 or di atardi.

Robert Ras, funcionario di Bureau City Inspector, den entrevista cu Matutino DIARIO, a splica cu di nan parti e tarea ta bay ta controla e bakinan di sushi cu lo tin disponible pa pueblo, y a informa cu ta bay  tin mas of menos 26 localidad, unda e bakinan mester ta ubica, pa nos comunidad bay deposita nan desperdicionan.

Ras a duna un relato di e areanan unda e bakinan lo wordo poni, p’asina orienta e comunidad.

“Nos ta bay cuminza den e distrito di San Nicolas, na Westkust- Batterij, unda ta bay tin bakinan pa deposita bo sushinan, ademas na Watertoren mas dilanti di Aruba Store San Nicolas; na Weg Rooi Hundo, parti patras di Community Pool cu tambe tin hopi sushi, y patras di Pepsi coi e ruta di unda e pista di avionnan di control remote ta. Nan ta trahando eynan cu diferente instancia boluntario, cu ta bay duna un man pa haci limpieza na e area eynan di San Nicolas. Siguiendo un tiki mas pabao tin e area di Cura Cabay, Mabon y Brasil.  

Na Cura Cabay ta bay tin baki tambe, poni pa nos hendenan, ademas na Scol Preparatorio Tarcisius College. Y siguiendo di pariba biniendo abao, pa cubri Aruba completo, nos lo ta na Savaneta y Pos Chikito; na Savaneta ta bay bira na veld di La Fama, y na Pos Chikito, Veld Universal. Nos ta sigui bin abao pa topa na Paradera, Mahuma, Wayaca, cu ta bay bira na Ecotech Units cu ta e parti cu lo keda habri constantemente, pa warda e hendenan bin trece nan desperdicionan. Na Dakota, Tarabana y Sabana Blanco, ta bay bira na Club Aduana, y tambe na Centro di Bario Dakota.

Na Santa Cruz, na Veld di Arsenal ta bay tin baki, y na Centro Deportivo Libertador Betico Croes, parti patras rond di e parkeerplats, lo tin machinnan accesible pa e comunidad pone nan sushinan. Y asina nos ta sigui bay abao coi Hooiberg, nos ta yega antes Indian Rock na unda e plenchi cu tin e bakinan ora nos a yega di haci Baki den Bario, eynan tambe lo tin baki ubica.

Y siguiendo e ruta di Paradera, Piedra Plat, bo ta haya net pariba di Domino’s Pizza, unda bo tin Leopoldo Ball Park, eynan ta bay tin baki, y bayendo mas pabao ainda nos tin e parti di Oranjestad: na Veld di Kriket na Vondellaan lo tin baki y e otro  ta na Harbor Arena. Den e stacionamento na Juancho Yrausquin, na Postkantoor na Oranjestad, eynan tambe ta bay haya baki”, señor Robert Ras, di Bureau City Inspector, a conclui.