Rey Willem-Alexander a bula ultimo biaha cu Boeing 737 di KLM

Awor e ta train pa cuminza bula cu Airbus A320neo

ORANJESTAD (AAN): Manera ta conoci, Rey Willem-Alexander di Hulanda tin un historia largo como un piloto apasiona y den pasado e tabata bula e.o. den cockpit y na control di avionnan Fokker 70 y tambe Fokker 100.  Ora cu tabata bula cu e avion aki den Caribe pa cualkier bishita Real, e mes ta na control di avion.

   Rey Willem-Alexander de vez en cuando ta bula cu avionnan di KLM tambe, y desde 2017 e tabata dispone di certificacion pa bula Boeing 737.  E tabata bula basta regular, y pasaheronan sinta den avion no sa mes cu nan mesun rey ta na control.

   Sinembargo awor KLM ta riba e proceso pa reemplaza tur nan Boeing 737 pa cuminza uza e avion Airbus A320neo.  Esey ta inclui Rey Willem-Alexander tambe cu awor tin di bay tuma les, y re-entrena pa bula cu avion Airbus.

   Recien Rey Willem-Alexander a bolbe bula un vuelo den Boeing 737, cu oficialmente a bira su ultimo biaha bulando cu e tipo di avion aki.  Despues di esaki, pronto e lo ta bulando pa prome biaha cu Airbus A320neo di KLM.

   Riba esaki, Rey Willem-Alexander a duna un declaracion: “Den transcurso di añanan, nos a transporta asina tanto pasahero di A pa B cu e Boeing 737. E mezcla di hende y momentonan aki a haci bulamento special.   Nos a transporta fanaticonan di futbol di Feyenoord y AZ pa Praga pa e Liga di Europa, muchanan pa Lapland pa topa cu Santa Claus, y hasta vuelonan di vakantie pa Ibiza y Malaga. Mi ta spera di yama e mesun grupo colorido bon bini bek riba e mesun grupo di Airbus.”

   Diaranson awor, Rey Willem-Alexander lo ta na Aruba pa celebracion di 50 aña di Bandera di Aruba, y 40 aña di Status Aparte.