Reunion importante teni abordo di barco crusero mara den waf

Expertonan di turismo di Aruba

ORANJESTAD (AAN): Siman pasa Diahuebs, e barco crusero Rhapsody of the Seas tabata di bishita na Aruba.  A probecha di e ocasion aki, pa tene un reunion meticulosamente organisa abordo di e barco.

   Ta asina cu Gobierno di Aruba, hunto cu Aruba Ports Authority (APA), Aruba Tourism Authority (ATA), y Royal Caribbean Group (RCG) ta colaborando pa fortalece e mercado latinoamericano di crusero.

   Presente na e reunion importante aki tabata e.o. Ministro di Turismo Dangui Oduber, CEO Ronella Croes di ATA, CEO Marc Figaroa di APA, Aduana di Aruba, Inmigracion di Aruba, Scheepvaart Inspectie, y e agente SEL Maduro & Sons.

   Tabatin deliberacionnan profundo, cu un intercambio di puntonan di bista cu Alberto Muñoz, kende ta Vice President di LATAM di Royal Caribbean Group, y señora Wendy McDonald, kende ta vice-president di Government Relations Caribbean pa Royal Caribbean Group.

   E reunion a centralisa riba e desaroyonan mas recien den mercado di crusero di Caribe y Latinoamerica.  E compromiso aki ta subraya e dedicacion di Aruba pa contribui actiuvamente na e desaroyo y consolidacion continuo di e sector di cruseronan, cu e meta primordial di fomenta prosperidad economico.