Reunion entre directora di UNICEF Hulanda y Departamento di Mucha y Hoben

ORANJESTAD (AAN):  Recientemente directora di UNICEF Hulanda, sra. Suzanne Laszlo como tambe sra. Anna Kroon, senior Specialist Kinderrechten Cariben tabata na Aruba en conexion cu diferente trabou.

For di 2020 Sue-Ann Ras ta trahando di cerca cu UNICEF Hulanda, unda cu a haya sosten tecnico di nan pa implementa Codigo di Proteccion na Aruba y actualmente Corsou tambe a cuminsa cu e trayecto aki.

   E sosten tecnico ricibi di UNICEF Hulanda, sigur a duna un tremendo resultado, mirando e importancia como tambe e relevancia di tin un sistema cu ta uniforme, structural y tambe sostenibel di traha preventivamente riba sospecho di abuso di mucha.

Jullie-Ann Thode, Efraim Suurendonk y Sue-Ann Ras a duna un bon update relaciona cu e logronan como tambe e retonan cu implementacion di Codigo di Proteccion den e 4 sectornan: salubridad, enseñansa, husticia y social.

   Actualmente Aruba ta conta cu 41 Supervisor di Codigo (SdC) y 10 Trainers di Codigo, di cual algun tin ambos rol. Tin un total di 28 instancia; gubernamental, fundacion y priva, cu ta sea trahando caba of ta den fase di implementacion di Codigo dentro di nan maneho diario. E aña aki e focus principal ta pa sigui duna sosten tecnico na e instancianan cu no tin nan protocol di Codigo di Proteccion ainda, mirando cu tin algun instancia cu ta for di 2020 a inicia den e trayecto, pero pa un of otro motibo for di alcance di e lidernan di proyecto, no a finalisa esaki. Mas cu claro ta importante tambe pa sigui haya e recapacitacionnan necesario, mirando e retonan cu varios di e SdC ta encontra den veld.

  Durante e reunion e team a presenta concretamente nan retonan y con lo anda cu esaki den 2023 y unda UNICEF Hulanda por contribui. Por remarca cu den algun organisacion e implementacion ta cana hopi rapido y practico, pero cerca otro, esaki tin mas resistencia y tambe falta di conocemento di Codigo, cu no ta exigi pa traha mas, sino pa traha mas eficiente y eficaz ainda. Ta bon pa enfatisa cu Codigo di Proteccion ta un ley, cu ta contene 5 paso concreto y uniforme, cu no ta rekeri un metodo specifico tampoco pa ehecut’e. Sra. Laslzo a complimenta e team y sigur ta contento di e pasonan concreto cu e team ta logrando y no ta descarta cu e retonan ta algo masha comun, incluso na Hulanda cu nan meldcode.

    Pa bolbe resumi, e SdC tin e rol di duna guia, sosten, facilita y percura pa e implementacion,  salvaguardia y anda cu Codigo di Proteccion, pa señala abuso di mucha y violencia relacional, unda cu mucha ta testigo, mas trempan cu ta posibel. SdC ta e profesional riba e area di Codigo y ta percura pa crea un ambiente laboral, unda su coleganan ta durf, kier y por anda cu sospecho di abuso di mucha. SdC ta un rol cu e profesional of un ‘beleidsmedewerker’ ta yena dentro di su organisacion, band’i nan funcion regular. E SdC ta percura pa e.o. e organisacion ta traha adecuadamente cu Codigo di Proteccion y ta responsabilidad di e director di organisacion pa facilita e SdC su rol como tal.