ORANJESTAD (AAN) – Formador Evelyn Wever-Croes, dunando continuidad na su reunionnan cu stakeholders e siman aki, a reuni tambe cu Fundacion Venearuba Solidaria.
Den conferencia di prensa posterior na e sesionnan di inicio di siman, señor Luis Zarraga, presidente di e fundacion FVS, a elabora tocante e resultado di e reunion aki.
Luis Zarraga a expresa cu e reunion cu Formador Wever-Croes a bay formidable. “Nos ta haya cu e invitacion pa participa den e reunion, ta habri un caminda hopi interesante pa e comunidad Venezolano, y den e reunion aki nos a pone nos mes na disposicion di e gobierno nobo.
“Pa nos ta un voz y oido pa e emigrantenan, e Venezolanonan for di Gobierno y viceversa. Viceversa, pasobra tin biaha tin mal informacion, of distorciona, di loke ta pasando den nos comunidad Venezolano.
Mientras cu si e Fundacion Venearuba Solidaria ta bira un brug entre Gobierno y e comunidad Venezolano hopi informacion ta bay sali corectamente, manera mester ta”, Zarraga a menciona.
Durante e reunion aki hopi punto importante a bin dilanti y despues di e reunion nos los haya sa realmente e posibilidad cu tin, y e fundacion tin confianza y Fe cu e situacion pa cu e comunidad Venezolano na Aruba ta bay bira diferente y hopi miho. El a bisa cu e comprension di e gobierno tey mes, pa delibera y busca solucion pa tur e problemanan. El a comenta cu el a bisa Formador cu ningun Prome Minister y ningun Parlamentario kier pasa pa historia como mal gobernante, y esey ta importante. “Y nos ta haya como Fundacion cu nos por haya e oido di Gobierno pa nos trece dilanti e diferente situacionnan di locual ta pasando den nos comunidad y nos ta sigur, totalmente convenci, cu e solucion lo bin pronto”, Zarraga a señala.
El a bisa cu nan a papia, entre otro, riba apertura di e espacio aereo, diferente situacion entre DPL y DIMAS. E ta haya hopi interesante, con den corto plazo, por trece un solucion.
Zarraga a comenta cu e aspecto cu ta carga mas prioridad ta e discordancia cu tin entre DPL y DIMAS, unda ta haci falta un informacion general. Como ehemplo, Zarraga a indica cu mientras DPL ta aproba un permiso. Esey ta un factor cu ta trece hopi gasto pa e Venezolanonan cu ta haciendo tramite di permiso, cu no ta bay e lihe cu mester ta. Esaki ta trece pa nan mas gasto, incomodidad, problema gravisimo pa un comunidad cu ta sufriendo.
“E comunidad Venezolano na Aruba ta pasando duro. Nos sa esey. Si nos por ta solidario cu nan, si nos por ta nan voz dilanti Gobierno di Aruba, definitivamente nos sa cu esey por cuminza cu e permisonan por bin, na prome lugar mas lihe y di dos cu un concordancia unico entre e dos departamentonan ya menciona”, Luis Zarraga di Fundacion Venearuba Solidaria, a señala.
