ORANJESTAD (AAN)- Continuando e siman aki cu su reunionnan cu stakeholders, Formador Evelyn Wever-Croes a reuni cu Stichting Algemene Bejaardenzorg Aruba (SABA),
y den conferencia di prensa cu a sigui na e reunion, señora Vrolijk a hiba palabra relaciona cu e resultado di e reunion aki, cu Formador.
Señora Vrolijk a expresa cu Stichting SABA ta hopi gradici di a haya invitacion pa participa como fundacion cu ta brinda cuido general na nos grandinan, pero tambe cuido cronico.
“Nos a trece dilanti nos preocupacion pa cu e sector aki y tambe nos por a comparti un rato tur locual SABA ta para pe y ta brinda, y tambe a bin cu nos ideanan cu nos tin cu tambe nos por bira un partner den esaki, pa solucionnan, cambionan, entre otro, den ley. Pa nos e tabata un momento hopi fructifero, y mi ta sigur y a wordo garantiza na nos, cu e parti di cuido cronico lo haya su atencion debido, den e gobierno cu ta formando nos dilanti”, e funcionario di SABA a comenta.
E tema di vergrjzing (envehecimento) a bin dilanti durante e reunion cu Formador, unda SABA a elabora tocante con e situacion actual ta, con lihe e ta bayendo y tambe kico tur ta e preocupacionnan cu ta bin cune, y cu SABA ta trata hunto cu esey.
E dama a menciona cu tempo cu SABA a cuminza e tabata un verzorgingshuis y locual SABA a desaroya desde aña 1972 te awendia, el a bira un verpleeghuis; e cuido, ta rekeri di hopi mas tempo, hopi mas compleho di loke tabata, no solamente pa e hendenan grandi pero tin hende di 52 aña cu tin demencia, cu tambe ta pashent di nos.
“Nos a trece dilanti algun idea, pensamentonan cu ya caba cerca nos ta den desaroyo y cu nos a comparti cu Formador, por ehemplo e cambio den ley, y actualmente nos tin AZV Cure, pero nos mester Care, kiermen cuido no solamente pa SABA pero pa cuido cronico den henter e Isla y sigur cu si, e tin su oido”, señora Vrolijk a indica.
El a splica tambe cu tin un ouderenzorg cu ta cay bao di Gezondheidsdienst, y SABA ta traha hopi cerca cu nan. Mesun problemanan cu SABA tin ta conoci cerca nan tambe, y tin un “Nationale Indicatie Commissie” cu ta traha cu e partnernan di hospital cu ta SABA, Wit Gele Kruis, Ouderenzorg y DVG y nan ta reuni un bez pa luna y SABA a comparti cu Formador con nan ta bay traha.
Encuanto e ola actual di Covid 19, señora Vrolijk a subraya cu door di e experiencia cu SABA a pasa aden durante e inicio di e pandemia, awo tin e privilegio cu nan grandinan ta bon. Aña pasa nan a haya nan mes cu siete caso, seis na Maris Stella y un na San Nicolas, cu danki Dios a recupera bon. SABA tin medidanan in place, tanto na Savaneta como na San Nicolas y Oranjestad, y na momento cu nan ta wordo suaviza SABA ta hacie y na momento cu mester bira mas severo tambe nan ta hacie pa e cuido. Esaki ta genera cierto stress pasobra tin trahado cu di un of otro forma por haya Covid-19 of ta den conexion cune, pero SABA tine bao bon control, den sentido di e medidanan cu nan tin vigente. Esaki ta encera uso di tapaboca, higiene, y con ta trata cu bishitanan. Actualmente bishita ta habri solamente pa famia, tin un horario di bishita y un lugar unda nan por sinta cu nan ser keri.
