Parlamentario Jennifer Reyes- Arends:
ORANJESTAD (AAN)--Parlamentario Jennifer Reyes-Arends, di Fraccion di AVP, den entrevista cu Matutino DIARIO a sigui elabora tocante e UTV tours, cu ta parti di e entretenimento cu ta wordo ofreci na e turistanan.
E parlamentario a señala cu UTVnan ta ocupa e 0.05% di tur e autonan cu ta circula na Aruba (ta 500 UTV), locual esnan cu ta registra y cu tin permiso, pasobra tin e parti cu no ta registra y cu tambe mester wordo reinforza, pa loke ta e parti di control. “Y si bo sa cu e ta pasando, duna indicacion di unda e ta, pasobra e ora ey mester wordo saca for di regulacion. Of nan mester percura pa haya nan permisonan, na dado caso”, e parlamentario a señala.
El a reitera cu nan procupacion aworaki ta kico nan lo haci y nan lo kier yega tambe na un acuerdo. “Nan kier e parti di dialogo cu gobierno, los di loke ta e parti di e Fundacion. Pasobra tin un fundacion cu ta boga pa e parti di naturaleza, y naturalmente nan tambe kier sinta cu gobierno, pasobra gobierno ta e entidad cu tin cu wak pa henter Aruba.
Nan tin cu wak locual ta trata e balang pa locual ta trata UTV, e parti economico, pero e parti tambe di naturaleza y yega na otro pa diferente solucion”, Parlamentario Reyes-Arends a indica. En todo caso, nan kier sinta cu gobierno pa wak con nan por yega na palabracionnan p’asina por tin mas trankilidad tambe den e sector.
“Hopi biaha ora bo no tin informacion bo ta haya speculacion di kico ta bay bin, kico ta spera nan, con ta para cu tur e trahadornan. Despues di tur esaki mi ta wak e hopi positivo caminda tin diferente proposicion di nan banda tambe pa wak kico por haci y no ta algo cu por trece un gran impacto, pero algo cu por ser haci. Di banda di fraccion di AVP nos ta boga pa esaki pasa pa nos por tin mas trankilidad”, Parlamentario Reyes-Arends a conclui.
