Inversion di 78 Miyon Dollar den proyecto Wartsila na discusion serio - Acusacionnan serio cu Gerencia di WEB a faya y neglisha WEB por completo - Un gerente di WEB ta costa Mey Miyon y accionistanan lo no reemplasa CFO
ORANJESTAD(AAN): Black-out total tabata e realidad di Pueblo di Aruba dia 3 di Juli 2021. Pueblo di Aruba a pasa den mal rato den e situacion cu a surgi.
Dia 22 di Juli accionistanan di WEB Aruba NV mester bini hunto den un reunion cu a wordo yama pa e Presidente Comisario. Riba agenda tin un punto sumamente serio, cu ta posibel retiro di Gerencia di WEB. Informantenan a mustra DIARIO cu no ta keda otro y cu Luis Oduber y Randolph Ruiz mester bay cas.
“Gerencia di WEB a faya y a neglisha WEB por completo. Pueblo ta paga e prijs,” informantenan clave di DIARIO a trece dilanti.
E decision directo pa tene un reunion di accionista pa dicidi kico mester pasa cu Gerencia di WEB, tabata e black-out di 3 di Juli cu a paralisa bida di Aruba y a pone bienestar personal di Arubianonan tambe na peliger.
Gerencia di WEB Aruba NV a mustra publicamente cu e loke a pasa por ripiti.
Informantenan clave ta splica DIARIO cu Gerencia di WEB no por presenta un plan cu ta indica kico mester pasa pa evita ripiticion.
Manera a wordo declara na DIARIO, mester tene cuenta cu e situacion tecnico di e boilernan y turbinanan di vapor, ta malo y cu mantencion structural no ta tuma luga mas.
E proyecto Wartsila cu a costa Pueblo di Aruba sumanan halto, tambe tin retrazo. WEB a presenta e proyecto aki como un proyecto cu lo a crea confiansa den bon produccion pero tambe cu lo a permiti economisacion di 850 bbl hfo pa dia.
E proyecto total lo mester a wordo realisa den 20 luna.
E contracto a wordo firma dia 20 di December 2018 y asina mester a bira operacional na Augustus 2020. Awor Gerencia di WEB ta anuncia cu e proyecto lo termina durante e prome cuatro lunanan di 2022.
Esaki ta nifica un retrazo di mas cu 18 luna.
Informantenan ta indica cu Covid-19 a percura pa un retrazo di 2 pa 4 luna. Esaki ta inplica cu hasta si tene Covid-19 na consideracion, tin un retraso di 14 luna.
Gerencia di WEB no a logra termina e proyecto Wartsila na tempo. Esaki ta nifica cu durante 18 luna extra WEB mester produci cu turbinanan di vapor inferior y inconfiabel. Ademas no por papia aki di e economisacion cu a spera.
14 luna @850 baril pa dia ta nifica cu ta uza 357 baril extra pa dia loke ta costa 18 Miyon Dollar cu ta 32 Miyon Florin Arubano.
A consecuencia di e asunto di blackour, a yama un reunion general di accionista pa discuti e situacion y e posibel consecuencia pa gerencia di WEB.
E reunion cu a wordo yama dor di e Presidente Comisario di WEB lo mester tuma luga dia 22 di juli 2021. Punto di agenda lo ta e posibel retiro di Gerencia di WEB.
Informacionnan ta mustra cu no ta solamente e black-out a conduci na retiro pero cu tin hopi asunto serio cu ta indica claramente cu WEB a actua pa priviligia su mes y cu costo enorme pa Pueblo.
Den un articulo special DIARIO ta presenta e motibonan directo di e decision di e accionistanan di WEB N.V., cu lo no tin confiansa den e funcionamento di e Gerente General y e Director Financiero di WEB.
Luis Oduber y Randolph Ruiz ta wordo acusa di no tin e capacidad necesario pa e funcionnan aki . E black-out di dia 3 di Juli 2021 a bira e punto culminante.
Ta wordo indica cu no por tin confiansa mas den Oduber y Ruiz y accionistanan no ta mira posibilidad pa sigui traha cu e dos personanan aki cu segun informacionnan clave ta riba lista di salida.
Den futuro WEB lo mester traha sin un Chief Financial Officer segun informantenan cu a indica cu un gerente di WEB ta costa por lo menos 550 Mil Florin annual.
WEB semper a funciona cu un Director y un manager financiero cu ta Jossy Lacle y Lidia Beukenboom.
Segun informantenan tempo di Mike Meza y Hoevertsz e funcion cu Randolph Ruiz ta ocupa a wordo crea. Tin pensamento cu politica por a hunga un papel.
Lo no nombra un reemplasante pa Ruiz y e director nobo di WEB lo mester cumpli cu e normanan di Prome Ministro Wever-Croes pa loke ta trata gasto di personal.
Gastonan exorbitante, seguro, pensioen y otro recompensanan lo no ta e caso mas.
DIARIO a trata di haya comentario di Richard Eman kende como CEO ta na cabes di Utilities Aruba pero no a ricibi su reaccion ya cu e no kier stroba e proceso aki.
DIARIO lo ricibi un comentario despues di e reunion general di accionista.
