Resultadonan di Aeropuerto ta confirma aña 2023 como uno record nobo pa turismo

Ministro Dangui Oduber

ORANJESTAD (AAN): Minister di Turismo, sr. Dangui Oduber, ta comparti un logro admirabel pa Aruba, esta e logro di Aeropuerto Internacional Reina Beatrix. Nos aeropuerto di Aruba den su dedicacion pa contribui na e industria di aviacion y turismo pa Aruba a mustra cifranan record durante ful e aña 2023. Cifranan final di trafico pa 2023 a supera tur expectativa, estableciendo firmemente Aruba su aeropuerto manera un concurencia regional mustrando crecemento y exito sin precedente.

   Den e aña 2023, Aeropuerto di Aruba a experiencia un crecemento impresionante di 13% den trafico di pasahero en comparacion cu aña 2022, logrando un recuperacion di 8% mas halto cu e cifra nan di 2019, y yegando na un logro nobo di 1,368,129 pasahero cu a sali di Aruba. Turistanan cu a genera basta entrada pa nos pais. E cifranan impresionante aki ta establece aeropuerto di Aruba como un lider den e region pa e industria di aviacion.

   Considerando e cifranan final den aña 2023 nos por conclui cu no solamente turistanan di calidad ta biniendo Aruba sino nan ta gasta hopi placa den nos economia cual ta confirma cu e maneho di minister Dangui Oduber ta dunando resultado.

   Minister Oduber ta gradici tur partner y tur cu ta laborando den e industria di turismo. Tur e personan aki ta haci cu awe Aruba ta sobrepasando tur espectativa den su recuperacion. Danki na e pueblo cu a demostra di ta uno resiliente, ban sigui demostra nos cordialidad y duna e hospitalidad na nos bishitantenan cu nos ta conoci pe. Turismo ta keda e driver principal di nos economia.