ORANJESTAD (AAN): Riba e fecha di Diamars 8 di Juni a observa cu exactamente 4 aña a pasa caba desde cu Fundacion Salud Mental Aruba ‘Respaldo’ a wordo funda door di Gobierno, AZV, Hospital, y Psychiaternan.
E motibo mas importante tabata cu e salud mental dentro di Aruba den contenido y cantidad no a crece hunto cu e cantidad di hendenan cu realmente mester di un bon atencion di salud mental y cu e desaroyonan internacional den psychiatria. Te ora cu a pone Respaldo funciona, cada aña tabata trata como 1.400 persona psychiatricamente, cu un presupuesto di como 12 miyon Florin pa aña.
Respaldo a cuminza duna servicio di forma independiente tur cuido di psychiater pa AZV. Cu un presupuesto di como 16 miyon Florin, nan ta yuda cada aña como 2.800 persona. Esaki ta un redoblamento den e cantidad di pashent, cu solamente 35% mas presupuesto. Den nan plannan actual, nan por duplica e servicio cu djis como 20% mas di presupuesto, y hasta yega asina entre 5.000 y 6.000 persona pa aña. E ora como 65% te 75% di tur Arubiano cu tin mester di yudanza profesional, lo por haya ayudo tambe.
Den ultimo añanan, a amplia e atencion psychiatrico di Respaldo cu dos FACT-teams, doble capacidad pa Psychiatria Infantil y Hubenil y expansion di e policlinica pa cuido di adulto. Esey nifica cu nan por ofrece un atencion mucho mas moderno, mucho mas rapido, y mucho mas amplio den tur forma.
Hunto cu ImSan nan a cuminza cu terapia di ECT (electroconvulsietherapie), pa cual antes mester a manda pashent pa haci esey na Curacao, Esaki ta un contribucion importante na e tratamento di depresionnan pisa. Hunto cu pediatranan, ginecologonan, y parteronan a bin cu e cuido POPP, pa cual tur hende na estado por wordo gescreen pa detecta problemanan sicologico y cu asina lo por duna un bon atencion na e baby chikito si esey ta necesario. Ta trata aki no djis e tratamento, sino e diagnostico di trempan y prevencion.
Respaldo ta un di e co-fundadornan di e ‘Veiligheidshuis’, cu ta un colaboracion di tur partido cu ta dedica nan mes cu hendenan cu debi na nan comportacion y problema, ta haya nan mes den contacto cu Husticia. Esaki ta contribui na e seguridad di henter Aruba. Tambe a firma un acuerdo cu Gobierno pa cual awor na Prison di KIA tambe Respaldo por bay duna cuido. Esaki lo mester por conduci cu presonan despues di nan estadia di KIA, ta keda haya e guia necesario y asina nan no ta cay bek rapidamente den e mesun comportacion cu ta un peligro pa nan y pa esnan rond di nan.
Riba termino di educacion y formacion, Respaldo a ricibi un reconocimento formal como instituto di formacion pa psicologonan di GZ (Cuido di Salud), y pesey awor tin 8 sicologo local hayando educacion. Tambe nan a ofrece formacion mas profundo na picologonan independiente na Aruba, y ta forma parti di e formacion di Docternan di Cas na Aruba, y ta ofrece training reconoci pa BIG na docternan di cas.
Aunke cu Repaldo, cu yudanza di partnernan manera Gobierno, AZV, y Hospital, a logra di tuma pasonan grandi dilanti, toch e cuido psychiatrico na Aruba ainda no ta na e nivel promedio di Reino Hulandes. Na e otro paisnan di Reino Hulandes ta gastando entre 50% y 400% mas per capita na atencion di salud mental. Compara cu e demanda pa atencion na Hulanda y segun un encuesta entre e Docternan di Cas na Aruba, ainda tin entre 5.000 y 8.000 persona na Aruba cu no a ricibi e atencion profesional necesario. E crisis di Covid-19 pa colmo a pone cu mas hende a haya nan mes bao presion sicologico, y e presion aki tambe a aumenta.
Respaldo a bati e alarma aki na comienzo di April caba na comunidad, na Gobierno, y na AZV. Nan tin e plannan full traha caba pa por ocupa nan mes cu gran parti di e problema, y pa esey nan ta discutiendo aworaki e plannan cu esnan di nivel mas halto di Gobierno y cu AZV. Nos ta spera cu pronto lo por haya un espacio pa haci algo cu e problema enorme aki. Sino lo contrario, Aruba lo drenta den un crisis cu hopi biaha ta mas grandi cu e crisis social cu ya caba Aruba tabata sufri di dje prome cu e pandemia di Covid-19.
Den cualkier caso, Respaldo den añanan venidero lo sigui haci su esfuerzonan pa apoya lo mihor posible, lo mas rapido posible, y lo mas pagable posible, tur e habitantenan di Aruba cu mester di atencion profesional pa nan salud mental. Pesey mes, e Raad van Bestuur di Respaldo kier a gradici tur e organizacionnan envolvi, entre cual tin tambe nan mesun empleadonan. Esaki di acuerdo cu nan mision: “Hunto nos ta respalda e Salud Mental na Aruba”.
