Minister Xiomara Maduro a entrega buki di su trayectoria na gerencia di DIARIO

Un gobernante cu a entrega un ehempel na futuro generacionnan - ORANJESTAD (AAN)- Diabierna mainta DIARIO a wordo honra cu bishita di cortesia di  Minister Xiomara Maduro.

Na e ocasion aki Minister Maduro a haci entrega na redaccion di DIARIO di su  buki “Cera conoci cu mi” y a conta tambe con el a bin cu e idea pa publica un buki.

Tabata un mainta masha ameno caminda Minister Maduro a wordo ricibi pa Damilice Mansur, Django Simmons, Aureen Werleman y Hubert Tiel kendenan cada uno a haya un buki y Minister Maduro a conta su vision, su mision y su balornan. Minister Maduro a bisa cu “Tin biaha ta presenta oportunidad den bida cu bo mester tuma” y asina el a tuma e decision pa subi e tarima politico di Aruba como candidato number 9, na aña 2009.

Minister Maduro ta conta cu un persona a yega di puntre pa describi den dos of tres palabra con e ta traha como politico y como mandatario di nos pais. Minister a bisa el a pensa un rato y su contesta tabata “Cu curazon y caracter”.

Como un hende muher mester bisa cu Minister Maduro, durante e aña pisa cu Aruba a pasa ta pasando aden, el a sa di para fuerte den su sapato y a sa di guia Aruba hunto cu su Gobierno riba bon caminda. Su vision ta pa mira Aruba como un  Pais na unda cada un di nos tin e oportunidad pa desaroya nan potencial. Un Aruba cu un economia fuerte ta su soño.