ORANJESTAD (AAN): Riba Diasabra 25 di juli, net despues cu solo a baha, Centro Maritimo Operacional di Wardacosta (MOC) a ricibi un yamada pidiendo asistencia riba lama.
Ta trata di un piscado cu a cay for di su boto den area pazuid di Refineria di Aruba na San Nicolas. E piscado a logra di uza su smartphone pa yama su casa, pa bisa e cu e tabata tin mester di yudansa. E casa na su turno a yama autoridadnan mesora pa pidi asistencia.
Centro MOC mesora a dirigi un unidad di Metal Shark cu rapidez den direccion di lama dilanti refineria. Tambe a pidi asistencia di e helicopter di Wardacosta pa lanta vuelo y asina yuda cu e buskeda.
Ora a yega den area di refineria, e Metal Shark a logra di mira e piscado teniendo na un boei. Dos boto cu tabata den e area a yuda saca e homber for di awa y a hiba e persona na oriya di lama.
Riba tera, miembro nan di Cuerpo Policial a ricibi e persona y tambe a pidi asistencia di ambulance. Na nan yegada, Paramediconan a check e piscado, y a constata cu e piscado tabata den bon estado di salud.
Tambe ta importante pa menciona cu otro piscadonan riba lama a logra di trece e boto bek canto. Danki na un y tur cu a asisti den e rescate aki.
