ORANJESTAD (AAN): Durante vakantie di scol, no tur mucha na Aruba tin oportunidad pa biaha of pasa nan dianan den actividadnan costoso.
P’esey, ta importante pa reconoce y gradici tur organizacion, fundacion, grupo comunitario y boluntario cu ta dedica nan tempo, energia y creatividad pa brinda nos muchanan un vakantie yen di actividad, enseñansa, conocemento y recreacion.
Den ultimo simannan por a nota cu constantemente tin anuncionan, riba Facebook y otro plataforma social, di campnan educativo, actividad deportivo, tayer creativo, programanan cultural y encuentro recreativo. Cada un di e iniciativanan aki ta contribui na desaroyo di nos muchanan. Nan no ta solamente tene nan ocupa, pero tambe ta yuda nan siña habilidadnan nobo, conoce otro mucha, desaroya confianza den nan mes y descubri talento cu tal ves nan no tabata sa cu nan tin. Mas cu tur cos, ta duna nan un temporada pa goza y prepara mentalmente pa e siguiente aña escolar.
Un palabra di aprecio ta bay tambe na tur e boluntarionan cu ta sacrifica parti di nan mes vakantie pa prepara, guia, transporta, cushina, vigila y anima e participantenan. E trabao aki no semper ta visibel, pero su impacto ta grandi.
Nos mester gradici tambe e mayornan cu, na cas, ta inventa actividad pa nan yiunan y amigonan di nan yiunan. Sega ta un atardi di obra di man, wega, cushina hunto, lesa of actividad den cura por crea recuerdo valioso y tene muchanan activamente envolvi.
Na mes momento, ta haci un apelacion na tur mayor: haci uzo di e oportunidadnan cu ta wordo brinda. Busca informacion, registra na tempo y laga bo yiu participa den actividad cu ta cuadra cu su edad y interes. Tambe verifica cu e organizacion tin supervision adecuado y un ambiente sigur.
Un vakantie bunita no mester ta uno leu of caro. Cu colaboracion, atencion y comunidad, nos por duna cada mucha na Aruba un temporada cu ta educativo, alegre y inolvidabel, pa nan futuro tambe.
