ORANJESTAD (AAN): Den fin di siman cu a pasa, personal di Wardacosta di Caribe Hulandes a logra di rescata un hende homber di nacionalidad Canades na momento cu su boto velero a haye den dificultad.
E notificacion inicial a bin di un avion Americano cu a detecta e velero durante di nan patruya.
Mesora a cuminza manda mensahe di asistencia den e area. E momento ey, un barco tipo 'Carrier' cu tabata cerca di e velero a purba di duna asistencia. Pero e nabegante Canades no tabata kier a bandona su boto.
Esaki a impulsa pa Wardacosta di Caribe Hulandes a saca nan avion Dash-8, y el a lanta vuelo rumbo pa e area panort di Aruba. Asina a bin nota cu e boto velero en realidad tabata basta leu nort for di Aruba.
Na yegada, nan a constata cu e nabegante Canades tabata den bon condicion di salud
Inmediatamente a notifica personal di e cutter ‘Panter’ di Wardacosta staciona na Aruba, pa dirigi su mes den direccion di e boto pa asina duna e asistencia necesario.
Di e forma aki e nabegante Canades a logra di subi 'Panter' y despues a tuma tur paso necesario pa asina por tou e boto y hiba esaki Aruba. Despues di a nabega pa hopi ora a logra di yega Aruba y cu asistencia di un unidad di Metal Shark a hiba e boto y e persona haf pa asina Aduana haci nan trabao.
Segun Wardacosta a splica, e nabegante Canades ta den bon condicion di salud.
