GEORGETOWN: Gobierno di Guyana y Republica Dominicana a firma Diamars un MOU (Memorandum of Understanding)
pa coopera pa busca companianan pa asina construi un refineria di 50.000 bari pa dia na Guyana pa asina haci uso di e rikeza di petroleo cu nan a descubri.
Cualkier proyecto lo bay ta pertenece por lo menos 51% door di gobierno Dominicano, segun e terminonan di e acuerdo MOU. Esaki a wordo firma pa president Irfaan Ali di Guyana, y president Luis Abinader di Republica Dominicana. E firmamemto tabata durante viahe di president Ali na Santo Domingo.
Gobierno di Guyana a expresa ningun interes di participa como accionista.
President Ali a bisa cu Republica Dominicana ta interesa pa ricibi suministro di combustible di e refineria, cu lo mehora e viabilidad di e proyecto.
El a agrega cu Republica Dominicana ta interesa tambe den exploracion pa petroleo, produccion di cuminda, y petroquimico na Guyana. Pero e no a duna detaye riba eseynan.
Prijs pa e suministro di crudo di petroleo pa e refineria lo tin di wordo negocia pa e participantenan di e proyecto bao di un contract di 30-aña, segun e MOU ta indica.
Mientras cu produccion di petroleo domestico ta expande na e pais aki, cu e meta pa yega 1.2 miyon bari pa dia na 2027, gobierno di Guyana ta tratando di atrae inversionistanan pa facilidadnan cu ta capaz di sigura suministro stabil di combustible na e pais, mientras reduci e necesidad di keda importa esaki.
Guyana semper tabata depende riba combustible importa pa su auto y vehiculonan y pa genera electricidad.
E potencial alianza cu Republica Dominicano ta pa e di 2ndo proyecto di refineria na Guyana. Autoridadnan ta revisando ofertanan di cuatro compania pa un otro refineria modular separa di 30.000 bari pa dia.
Pa tur dos refineria, crudo lo bay bin di e petroleo saca for di suelo di Guyana mes door di un consorcio lidera pa Exxon Mobil, cu a descubri mas di 11 biyon bari di petroleo na e bloke Stabroek cu ta riba lama dilanti costa.
