ORANJESTAD (AAN): Informacion for di Den Helder, ta indica cu e caso di tiramento cu a tuma lugar na e ciudad ey na Hulanda durante di e fin di siman tras di lomba,
unda 3 hende a keda herida cu bala, di cual 1 a fayece, a cuminza haya final den e investigacion.
E persona cu a fayece tabata Lavernie Martis, un hoben Antiyano di apenas 25 aña di edad.
Polis a cuminza haya sa, cu e pareha di Lavernie tabata worde molestia constantemente pa un homber conoci como Kevin S. Mas cu claro, esaki a pone cu e situacion entre e hendenan aki a bira tenso.
E marduga ey, Lavernie Martis a bin topa cu Kevin S. y aki a bay reclam’e pa e laga su pareha na pas. Pero e discusion a escala, y Kevin S. a saca arma y a cuminza los tiro pa loco. Impacto di bala a dal Lavernie na su garganta cu a bira e herida mortal tambe.
Ora cu Kevin S. a haya sa cu Polis ta buscand’e tur caminda, el a dicidi pa riba Diamars anochi e mes bay entrega su mes na Polis na Den Helder.
Den Helder ta situa como 60 km panort di Amsterdam.
