ORANJESTAD (AAN): Informacion for di Republica Dominicana, ta indica cu autoridadnan hudicial na e pais a caba di extradita
e homber hulandes Dennis G. (potret banda drechi) di 48 aña di edad, na Ministerio Publico di Hulanda. E hulandes Dennis G. ta wordo sospecha di ta envolvi den contrabando gigantesco di cocaina, y na 2023 riba peticion di Husticia Hulandes, el a wordo aresta na Republica Dominicana.
Diahuebs mainta 30 di Mei, e avion a yega Hulanda, y bao custodia di Marechaussee, nan a baha cu Dennis G., y awe Diabierna e lo aparece dilanti Huez Comisario.
Na comienso di luna di Mei, Corte Superior di Republica Dominicana a bay di acuerdo pa extradita Dennis G., kende pa mas di un aña a resisti contra esaki.
Corte Superior a duna OK tambe pa deporta Urvin ‘Nuto’ Wawoe di 43 aña (potret banda robez), kende ta lider di e gang criminal ‘No Limit Soldiers’ di Curaçao. E lo wordo extradita pa Hulanda.
Logra localisa nan: Tabata dia 15 di April 2023, cu a aresta Dennis G. na e capital Santo Domingo. Ta for di Hulanda, e unidad Landelijke Opsporing en Interventies (LO) di Polis Hulandes a logra haya sa e localidad di e homber, via di comunicacion scrambled (encrypted) di servicionan di message Ennetcom y SkyECC.
Ministerio Publico ta acusa Dennis G. di ta meti den varios transporte internacional di en total riba di 2.000 kilo di cocaina.
Dennis G. ta originalmente di Utrecht pero a crece na Nieuwegein. E tabata anteriormente envolvi den contrabando di cocaina. El a keda deteni den e ‘Caso Vista’, y Corte na Haarlem a dune condena di 2 aña di prison na 2013. E persona principal den e caso aki pa cu transporte di cocaina tabata Freek de K., kende ta di Ijmuiden.
