Representantenan di SV Dakota y Centro di Bario Dakota a bay mustra Prome Ministro nan plannan

Nan ta celebrando 75 aniversario

ORANJESTAD (AAN): Mas y mas e trabaonan pa comunidadnan na Aruba ta tumando mas forsa pa asina brinda especialmente nos hobennan mas oportunidad pa ta ciudadanonan fuerte cu ta duna back na nan pais. Esaki sigur ta un meta di S.V.Dakota y Centro di Bario Dakota tambe.

   Durante un reunion cu representantenan di S.V. Dakota Gilmar Croes, Carl Michael Bikker, Hendrik Tevreden y arquitecto Raffy Kock, Prome Minister Evelyn Wever-Croes a haya un miho bista riba e trabaonan cu ta worde haci pa e districto Dakota. E representantenan menciona a elabora riba e bunita plannan di expansion y nan celebracion e aña aki di nan 75 aña. Prome Minister a gradici S.V. Dakota y Centro di Bario Dakota cu ta traha incansablemente pa logra cosnan grandi pa e club y pa Dakota.