ORANJESTAD (AAN)– Riba14 di December, Ministerio di Salubridad Publico a ricibi bishita for di un representante di Ministerie van Volksgezondheid, Welzijn en Sport (VWS) di Hulanda.
E bishita aki a wordo teni en cuadro di e programa actual di vacunacion na Aruba cu ta regarda e prome vacuna, di dos vacuna y e “booster shot”.
Un bishita a wordo haci na Centro Libertador Betico Croes, na Santa Cruz, unda cu VWS a haya e oportunidad pa mira unda ta administrando vacuna durante 3 dia largo. Na un centro grandi asina, ta mas facil ofrece e posibilidad pa mas persona yega y haya chens na un manera organiza pa ricibi nan di prome vacuna, di dos vacuna of e booster shot.
Tambe VWS a haya oportunidad pa wak e bus cu lo bai core di bario pa bario, pa asina promove y stimula mas hende tuma nan vacuna.
VWS a keda masha satisfecho cu e programa presenta na nan y a mustra aprecio cu nan por a bishita Centro Libertador Betico Croes y sera conoci cu e Bus di Vacuna.
Un danki ta bay na Staatssecretaris Blokhuis y VWS pa nan sosten financiero, cu Aruba awe por tin un bus asina aki.
Finalmente un recordatorio cu tin 2 dia mas unda por ‘Walk In’ entre 8 or di mainta y 4 or di atardi na Centro Libertador Betico Croes, non-stop, pa busca e vacuna cu bo falta sea ta e prome dosis cuminsando for di 12 aña, di dos dosis of e 'booster shot' cuminsando for di 55 aña.
