Representantenan di Departamento di Comunicacion pa gobierno Hulandes a reuni cu prensa di Aruba

ORANJESTAD (AAN): Diabierna miembronan di e departamento di comunicacion pa gobierno Hulandes tabata na Aruba y hunto cu un representante di VNO di Aruba, nan a tene un encuentro cu prensa, pa asina conoce otro mihor.

Tin miembronan di prensa cu ya caba sa tin contacto cu un of mas di e personanan aki via email etc., pero awor nan a haya e chens di topa personalmente cu e personanan aki y tene combersacionnan ameno.

Lucia Beck, ‘liaison communicatie’ pa ministerio di Asuntonan Interno y Relacionnan di Reino a cuminza na bisa cu alrededor di dos aña pasa nan a haya e peticion for di e ministerio pa nan tin mas contacto cu prensa di Corsow, Aruba y Sint Maarten.

“Locual nos a haci ta, nos a cuminza saca mas comunicado di prensa y nos a tene mas contacto cu prensa di e tres paisnan”.

Esaki tin di haber tambe cu henter discusion cu tin riba COHO y tambe locual cu ta sosode den Rijksministerraad, decisionnan pa tranchenan di financiamento y donacionnan cu a wordo haci.

Pues nos a cuminza cu Corsow prome y awor nos ta trahando cu Aruba, pa nos crea un mihor contacto cu prensa, pa nan haya sa con nan ta haya nos ora cu por ehempel nan tin pregunta pa Secretario di Estado of cualkier otro pregunta cu tin riba TWO, cu antes tabata tin e nomber di COHO, segun Beck.

El a sigui bisa cu ora cu por ehempel decisionnan wordo tuma den Tweede Kamer, nan lo por comparti esaki cu prensa.

“Tambe prensa por acerca nos ora cu Secretario di Estado bishita e isla y nan ta interesa den un entrevista cune”, segun Beck kende ta biba na Boneiro, pero ta biaha entre tur e islanan pa e contacto cu prensa.

El a sigui bisa cu e intencion ta tambe pa duna prensa informacion despues di cada Rijksministerraad, te hasta si no a logra un resultado concreto.

Kim Sambo y Nydia Adam tambe ta forma parti di e team di comunicacion y Adam kende ta consehero di comunicacion y informacion di TWO Hulanda(Tijdelijke Werk Organisatie), cu ta facilita e paisnan den e landspakketten.

El a splica cu casi tur dia nan sa tin contacto y comunicacion cu prensa di e islanan.

Adam, Sambo y Beck ta tene contacto cu otro frecuentemente pa intercambia di idea y pensamentonan, yudando otro asina.