ORANJESTAD (AAN): Pa fomenta colaboracion y intercambio di practica entre bibliotecanan di Caribe Hulandes y Hulanda,
Koninklijk Bibliotheek (KB) a organisa un programa educacional online basa riba e principionan di intercambio virtual.
Intercambio Virtual ta un enfoke pedagogico inclusivo den cual participantenan ta adkiri experencia y abilidadnan nobo atraves di dialogo facilita online. Igualdad y reciprocidad ta algun di e principionan clave cu a guia e enfoke.
Meta principal di e programa educacional online aki tabata pa promove un intercambio virtual y colaboracion entre trahadonan di biblioteca y organizacionnan di Caribe Hulandes y Hulanda. Rond di e tema comparti di e papel cu un biblioteca publico ta hunga den siglo 21, a enfoca specialmente riba e papel socio-educativo di un biblioteca publico.
Den seis sesion di dialogo facilita (online) di dos ora cada un, participantenan a cera conoci cu otro y nan situacion, intercambia experencia for nan propio contexto local, siña for di otro y hunto traha riba un presentacion final.
E presentacion a tuma lugar, 23 di augustus 2023 na WLIC IFLA 2023 na Ahoy Rotterdam, unda tur participante a topa otro cara a cara y experencia hunto e conferencia internacional di biblioteca di mas grandi.
Lilian Semeleer y Zetsia Ponson di Biblioteca Nacional Aruba a participa den e intercambio virtual “Ami, Abo y Biblioteca”.
