Den transicion mundial pa era nobo y exigencia gubernamental grandi
- Acuerdo cu Acciona lo habri porta pa exportacion moderno
- Compania di renombre internacional ta presenta Aruba na mundo
ORANJESTAD (AAN)- Un siman sumamente importante a cera pa Aruba, cu ta drenta September 2023 como parti di noticia economico y financiero internacional.
Pa analisa e final di Augustus, cu a trece hasta reto di un tormenta riba Aruba, DIARIO a evalua sucesonan di e siman aki pa asina hunto cu su expertonan social economico, presenta na Aruba e informacion mas importante pa Aruba na e momentonan aki.
Kico ta importante pa Aruba como pais? E futuro di su Pueblo cu ta depende di un gobernacion capaz pa actua y dicidi kico ta importante pa e pais na e momentonan aki y kico mester ta su meta principal pa guia Aruba na e momentonan aki.
Pa cera Augustus pues, na prome lugar mester analisa kico na e momentonan aki ta merece di ta topico na e pais a base di e situacion internacional.
Manera DIARIO na forma amplio ta analisa, investiga y ta presenta na su lectornan, felicidad di un Pueblo ta sconde den e posibilidad pa un Pueblo liber, dirigi na forma democratico pa gobernantenan y gremionan cu por comprende kico ta biba den curazon di un Pueblo, produci e base di bienestar di uno y tur.
E prome necesidad di hende pa sobrevivi segun tur regla internacional y central den Constitucion di Reino y di Aruba, ta pa e Pueblo liber di Aruba por tin un dak trabou, un forma di gana su pan di cada dia y un dak riba su cabez na prome lugar.
Principio di democracia no ta palabra grandi. Realidad di democracia, no por wordo busca den nada otro cu no ta den e felicidad di un Pueblo, cu mester por sinti cu su gobernantenan na prome lugar ta interesa den su lucha diario pa sobrevivi den condicionnan humanamente acceptabel.
Bon gobernacion ta cuminsa cu entrega na Pueblo di posibilidadnan, cu ta habri caminda pa trabou produci garantianan basico di bienestar.
Sigur den un situacion mundial di mal noticia tras di mal noticia, bon gobernacion ta exigi aliento constante di Pueblo cu no por zink den depresion ni fantasia cu ta destrui su porvenir.
Aruba ta biba awe cu resultado di gobernacion di fantasia, di gobernacionnan cu a resulta den corupcion cu ta mancha e imagen di Aruba y mester conoce rechaso total ya cu esaki ta kibra e porvenir di Pueblo.
Corupcion cu ta kita pan y kibra imagen di un pais mester wordo condena y castiga y si prensa kier yama su mes liber, e ta defende loke ta bon y rechasa loke ta malo.
Na entrada di un September cu manera DIARIO a indica lo mester hiba na e momento cu Gobierno di Reino ta anuncia su plannan pa futuro riba Prinsjesdag y gobierno di Aruba su plannan pa Aruba riba e Dia di Apertura di Aña nobo di Parlamento, e pregunta grandi mester ta, con tur Arubiano tin oportunidad pa drenta un futuro cu ta garantisa nan trabou, pan riba mesa y placa pa gasta na nan necesidadnan loke lo produci actividad comercial ora gremionan ta sirbi otro na beneficio di e pais.
Den e cuadro aki, e factor mas importante pa Aruba na salida di Augustus pa drenta November ta, e informacionnan cu e compania di renombra internacional a presenta na mundo den cual e ta anuncia cu el a forma un acuerdo basico cu Gobierno Evelyn Wever-Croes a base di e tremendo posibilidad cu Ministro di Asuntonan di Energia, Glenbert Croes, a crea pa Aruba.
Manera ya bisa mundo ta den transicion, loke ta nifica cu Aruba tambe ta den transicion.
Mester bandona un epoca cu Pandemia di Covid-19 sigui pa Guera di Ukraine, inflacion a base di e guera mundial di Petroleo cu ta haya cantidad di nomber, a crea.
E trabou mas importante di Gobierno di Aruba ta pa percura pa Comercio por sigui produci trabou pa asina comercio hunto cu trahadornan por produci e economia, cu Gobierno mester alenta.
Medionan di Comunicacio, Prensa, ta debe su existencia na guia e pais cu informacionnan cu no ta zink e pais cu sensacionalismo, pero ta condena loke ta malo y ta sostene loke ta bon, pa duna aporte di Prensa Liber, na futuro di e pais.
Na entrada di September cu ta e luna cu lo termina cu entrada di e ultimo trimester di 2023, pues e conclusion di 2023, analisis di posibilidadnan pa Aruba den futuro, ta pone central e proyecto pa introduccion di Hydrogen Valley, cu no solamente ta trece Aruba e energia nobo cu ta reemplasa petroleo, pero tambe ta habri porta pa exportacion industrial cu lo amplia economia di Aruba y asina crea posibilidad nobo pa comercio, pa trahadornan pa Aruba mes, cu aumento di entrada nacional.
Sosten economico pa Aruba, ta loke a resona e siman aki riba plataforma internacional comercial pa medio di Acciona!
