ORANJESTAD (AAN) – Rene Ridderstaat a conta den un entrevista, con e Fundacion Refugio Social (FRS) a surgi, y con e iniciativa a wordo realiza.
El a menciona cu antes den e edificio cu nan ta ocupando, tabata tin Cas pa Hubentud, cu tabata un stichting completamente apart.
“Anto nos a acerca nan pa haci algo manera un centro di encuentro pa hoben, pero instancianan a bisa cu no tin facilidad pa un opvang adecuado pa hende homber, manera tin pa hende muher”, Ridderstaat a indica.
El a agrega cu tin casonan unda mester un tempo un tiki mas largo, pasobra no tur ora por haya solucion den corto tempo. Cada caso, cada situacion, ta diferente; e ora ey nan a acerca instancia pa e posibilidad di yega na fondonan, na un plan na unda e fondonan ta bin di Hulanda.
Hulanda a bisa si, cu si tin un bon plan nan ta sostene e proyecto pero mirando cu e stichting no por a haya fondo directamente for di Hulanda, nan a sinta cu CEDE Aruba y VNO. Esey si por a tuma lugar, y e ora ey e stichting a traha un project dossier cu a manda pa Hulanda, pero prome cu esey, mester a sinta cu diferente partnernan u e fundacion ta traha cu nan, na unda nan a duna e input di “esaki ta e necesidad cu tin”.
E fundacion a scoge pa duna ayudo na hende homber, pero si tin un caso excepcional di un famia, tambe lo por tin e posibilidad pero esey ta dependiendo si tin un instancia cu tin acuerdo cu Fundacion Refugio Social, cu lo kier haci uso di dje.
“A base di esey nos a manda e project dossier na Hulanda, y den dos pa tres siman nos a firma e acuerdo. Nan a bisa si, cu nan ta pone un suma disponible pa haci e trabaonan”, Rene Ridderstaat a señala.
El a sigui bisa cu e trabaonan a dura un poco pa haya e vergunning pa e construccion, y e mapanan mester a wordo pinta. Despues a logra cu un contratista. A haya meneer Mercalina cu a haci e parti hunto cu CEDE Aruba, y cu a wordo asigna como e persona cu ta bay controla e construccion.
Danki na su bon trabao y cu a keda hacie na e punto, a logra den cuater luna cuminza cu e construccion, y finaliza esaki tambe.
“Nos ta actualmente buscando e mobiliario pa e facilidad. Tin instancianan internacional y local cu ta dispuesto pa yuda nos”, Ridderstaat a subraya. Ora esaki ta cla, nan por cuminza ricibi hende, pero nan mester di instancianan pa cera acuerdo di cooperacion. Nan ta bezig cu Ministerio di Asunto Social, un concepto di cooperacion a bay pa nan, y nan ta bay wak si ta algo cu pa nan ta ok, anto a base di esey ta cuminza traha.
El a agrega cu e idea ta cu si tin un situacion, cu por ehemplo Instancia A cu tin un acuerdo cu e FRS, Instancia A tin e persona di contacto. Si e tin cliente, ta yama e miembro di e directiva di e fundacion encarga cu e facilidad, informe cu ta bin un of dos persona pa “x” temporada. Nan tin un beheer 24 ora den e facilidad, cu ta controla cu tur cos draai bon eynan pa seguridad, y esey ta haci cu e persona por keda. El a remarca cu no ta asina cu cualkier hende por yega bati na porta y e por keda, pasobra asina no tin control. E instancia cu ta referi e persona na e fundacion tin cu zorg pa dune guia, pa e por sigui despues cu si bida normal. Cu ayudo di VNO e fundacion ta bay bin cu un cushina social, pa duna les di cushinamento y haya fondo tambe for di dje. Asina Rene Ridderstaat, presidente di FRS a conclui.
