Drs. Melva Croes-Yanez, Presidente Fundacion Alzheimer:
ORANJESTAD (AAN)—Den entrevista cu Drs. Melva Croes-Yanez, Presidente di Fundacion Alzheimer Aruba (FAA), el a elabora tocante e tema di remedi pa loke ta trata e malesa aki, y specificamente el a referi na “Lecanemab”.
Drs. Croes-Yanez a señala cu e aspecto di remedi pa Alzheimer ta un problema grandi na Aruba. Personanan cu ta wordo diagnostica cu Alzheimer, na otro caminda, ta bin regularmente cerca Fundacion Alzheimer Aruba.
El a subraya cu ta bon conoci, cu Alzheimer no ta e unico malesa cu mester haci diagnostico riba dje. Ora cu mester busca un specialista pa haci diagnostico, semper tin cu mira e causa tras di dje.
“Tin hende cu ta bin cerca nos cu hala di remedi. Nos ta yam’e ‘poli-pharmacy’ ora cu ta riba cinco remedi, y tin hendenan cu tin 12-23 forma di remedi, cu ta remedinan peligroso, loke pa un hende grandi ta hopi fastioso, pasobra e personanan aki ta bay cay, ta bay lubida, nan ta actua comosifuera nan tin Alzheimer. Anto, si bo tin un hende asina y bo ta dun’e remedi, anto bo ta bay haci diagnostico riba dje, sigur cien por ciento, abo ta esun cu ta bisa e ora ey, depende di bo conocemento, bo ta bisa mesora ‘ah, Alzheimer e ta’. Hasta cu bo ta trec’e asina leu, cu bo ta pone polisnan kere cu un persona asina tin Alzheimer. E pobernan no por yuda, tampoco, pasobra enberdad asina e persona aki ta haci su comportacionnan, comosifuera e tin un of otro condicion”, drs. Croes-Yanez a indica.
Drs. Melva Croes a referi, seguidamente, na e remedi “Lecanemab”. El a bisa cu e remedi aki a bin p’ataca e proteina B-Ameloid, den e cerebro, cu ta un di e causanan di Alzheimer.
“Nos no ta papiando akinan di demencia total, of trastornonan neuro-cognitive unda tambe bo ta haya cu hendenan ta lubida y haci otro cosnan, cu hendenan tambe ta bisa cu ta Alzheimer e tin. Aki na Aruba enberdad, ta un sentimento mi tin, cu ta yama tur cos Alzheimer, y nan ta bruha e malesa aki cu hende grandi, adulto mayor. Alzheimer ta algo cu hende jong tambe por hay’e. Pero e parti di Lecanemab ta un remedi cu solamente pa comienzo di Alzheimer e ta. E no ta pa hendenan cu tin otro sorto di condicionnan”, drs. Melva Croes-Yanez a subraya.
