Director di DTI, Richella Dorothal:
- Doño di trabao mester yama y pidi investigacion na DTI ora tin accidente serio
ORANJESTAD (AAN) Dialuna cu a pasa, a keda celebra e Dia Mundial di Seguridad y Salud na pia di Trabao, y den e contexto aki, señora Richella Dorothal, directora di Departamento di Inspeccion Tecnico (DTI), a elabora riba e tema aki.
Enfoke e aña aki ta bay riba e lema: “Revolucion den e sector di seguridad y salud: e papel di IA y e digitalizacion na trabao”.
Dorothal a bisa cu esaki ta indica un proceso pa prevencion di accidente laboral, y e dia aki ta mas bien pa concientiza riba e seguridad den e parti laboral. Y e tema, e aña aki ta indica e parti di IA, digitalizacion y kico eigenlijk ta su consecuencia. “E ta reformando e sistemanan actual; hopi hende lo bisa cu e ta pa kita hendenan for di trabao, esey ta e pensamento, pero no necesario e ta esey so. Nan ta duna como ehemplo e robots cu ta tuma trabaonan di e hendenan cu ta den riesgo halto y esey ta yuda, den e parti personal, di evita por ehemplo, lanta carganan pisa, traha den ambientenan toxico, traha den lugarnan excesivamente caluroso, cu tur e consecuencianan cu por tin pa e curpa di e trahado. E digitalizacion tambe por haci un cambio den esaki”, señora Dorothal a señala.
El a agrega cu asina no solamente por evita accidentenan laboral, pero por tin un sistema mas structura pa por controla e procesonan tambe.
Señora Dorothal a agrega di parti di DTI, nan ta traha riba e parti di prevencion di accidentenan laboral, y nan tin e ley cu ta regarda accidentenan na pia di trabao. Ora tin un accidente laboral mesora ta mester contacta DTI y sigui un proceso. Esaki no semper ta pasa, of no tin e informacion. Nan ta ricibi informacion tambe di e Central di Alarma, cu tin un accidente laboral pa nan por presenta, y a base di esaki DTI ta bay na e sitio.
DTI por haci un onderzoek y despues di esaki lo por tin un rapport accesible pa e esnan concerni, pero si no yama DTI despues di un par di dia, y despues di un siman a manda un rapport pa haci investigacion, esaki lo no ta posible, mirando cu DTI ta haci esaki na momento cu e accidente a tuma lugar of un tiki despues. Dorothal a splica cu tin gradonan di accidente, e partinan mas chikito no mester meld, pero e ta parti den accidentenan severo, cu mester tuma contacto cu DTI pa haci e investigacion necesario. Tin accidente unda e victima mester wordo hiba na un centro medico, por ta cu consecuencianan cu e victima por keda parcial of completamente invalido y mester haci e peticion pa investigacion via DTI. Esaki ta keda na e doño di trabao pa haci’e, pero tambe e trahadornan of esnan cu tabata rond di e victima por yama DTI y haci e peticion.
