ORANJESTAD(AAN)- Na momento cu Covid-19 a presenta su mes na 2020, hende a sinti su mes impotente contra e malesa cu a destrui normalidad mundial.
Na prome momento tabata papia di remedi efectivo, pero cu no a duna resultado finalmente y tabata informacion cu a logra un vacuna cu a pone mundo cuminsa arma su mes contra e malesa.
E siman aki a cuminsa cu un informacion cu, manera expertonan ta bisa DIARIO, mester ta un motivacion pa mas cu nunca hende vacuna y sigui tur medida pa combati Covid-19 cu e promesa cu Molnupiravir lo por deshaci di e malesa ora e afecta pashentnan den grado menos severo.
Ya testnan a wordo haci den laboratorio riba animal y un grupo chikito di hende y mester bay duna inicio na e ciclo mas importante di pruebanan pa determina si realmente e remedi ta efectivo pero tambe kico lo ta su efecto pa ser humano,
DIARIO a base di prome informacionnan ricibi for di exterior, a drenta den contacto cu expertonan cu ta informa e matutino di Aruba y cu a mustra cu awe mas cu nunca mester pidi tur hende pa tene speransa y sigui tur instruccion pa evita Covid-19 di plama cu un promesa na bista.
A wordo splica bon cla, cu no por papia di un siguransa di cien porciento y cu ainda ta hopi tempran pa bisa con efectivo e remedi ta, pero tur resultado di investigacion te awor ta brinda un promesa importante na hende.
E remedi nobo lo no ta un inyeccion manera a wordo splica pero un pildo y hasta ta wordo bisa cu e lo tin base natural.
Tabata e Universidad di Emory na Atlanta cu a mira desaroyo di e remedi na man di Drug Innovation Ventures at Emory.
E compania Ridgeback Biotherapeutics a sigui cu e trabou cu a inicia y despues a bira partner di Merck & Co. pa sigui traha riba e remedi.
Informacionnan ta indica cu mundialmente ta bay cuminsa cu testnan pa defini e efacia di Molnupiravir como tratamento contra Covid-19.
Informacionnan a base di un estadio Fase 2 na Merca, a duna resultado prometedor. Awor mas estudio clinico mester wordo haci segun informantenan cu a papia di resultadonan di estudio den laboratorio.
Segun informacion, Fermenta Biotech Limited a anuncia cu el a desaroya cu exito y a pidi patent pa e tecnologia pa desaroya e remedi, cu ta wordo considera importante tambe pa e hecho cu su produccion basico lo ta natural.
DIARIO den su proximo edicionnan lo duna mas informacion di e promesa, pero advertiendo cu ta trata di un promesa cu ta duna suficiente animo pa awor mas nunca yuda bringa Covid-19 cu un posibel remedi efectivo den desaroyo y drentando e fase di prueba clinico determinante.
