ORANJESTAD (AAN): Durante siman, director ing. Edwin Jacobs di AZV a tene un conferencia di prensa pa asina duna un informe di e relato financiero 2021, y tambe di e retonan cu tin e siguiente añanan.
E director a elabora extensivamente riba varios cifra manera e desaroyo di cantidad di aseguradonan, e gastonan di cuido, entradanan, e resultado di e “Wave 5 model”, e gastonan di administracion, e diferente specialismonan y e proyecto plan di implementacion 2022.
Cu cifranan su dilanti, ing. Jacobs a mustra cu si tira un bista riba e gastonan administrativo di OE AZV, aki tambe tin reduccion, esta di 18.2 miyon Florin den 2018 pa 16.9 miyon Florin den 2021.
E suma aki ta inclui e contribucion di e empleadonan di OE AZV.
Gastonan di cuido medico specialisa: Si mira e gastonan di admision y cuido na Dr. Horacio Oduber Hospital, ta wak cu esaki a subi.
OE AZV ta paga “lumpsum” esta un suma pa un pakete di servicio. E desaroyonan mas importante tabata un capacidad limita di cuido intensivo debi na covid, limitacion di cuido electivo, lista di espera mucho largo y no tabata tin mucho data disponibel pa AZV.
Esaki ta algo cu lo mester haya atencion den añanan nos dilanti; esta pa haya miho bista kico tur nos ta paga pa e 179.7 miyon Florin cu ta paga na hospital.
Gastonan di cuido medico den exterior: Akinan por wak cu compara cu 2019 unda a saca 57.6 miyon Florin. Aña pasa tabata 27.0 miyon. Akinan tin cu tene cuenta cu dos desaroyo hopi importante.
Pa motibo cu Colombia a cera, mester a referi casonan pa Hulanda unda gastonan a subi pa motibo cu cuido na Hulanda ta mas halto, pero di otro banda locual a reduci gastonan den 2021 tabata e inicio di tratamento cu radioterapia na ImSan aki na Aruba mes.
