ORANJESTAD (AAN): Ya caba e asina yama “Praktijk Ondersteuner” na Aruba ta existi pa 10 aña!
Diez aña di ta dunando servicio na hopi ciudadano cu ta sufriendo di malesa cronico, y cu ta haya extra atencion na consultorio di nan Docter di Cas.
Durante un conferencia di prensa convoca na Centro Kibrahacha, e director Gino Goeloe di Wit Gele Kruis Aruba a indica cu Diadomingo 22 di Mei ta e dia cu Praktijk Ondersteuners ta celebra nan dia, pero e observacion di 10 aniversario ta na Juli.
Debi cu lo bay tin un evento awe na Centro Kibrahacha, lo bay check presion, sucu, y mas di tur hende.
Servicio di POH a cuminza na 2012 den deliberacion cu HAVA, AZV, y Wit Gele Kruis, unda a bin ripara cu pashentnan mester di mas tempo ora di bishita Docternan di Cas. Pasobra e tempo ey a ripara cu Docternan ta man yen, y nan no tin manera pa atende e pashentnan cronico di diabetes y esnan cu ta sufri di presion halto.
Aki ta unda cu a brainstorm hunto cu HAVA, principalmente Dr. Samuels, Dr. Chung, y Dr. Jacques van Veen (qepd) cu tabata personanan cu a kere den e proyecto, y tambe dos Dr. Vis y Dr. Britt-Croes cu den nan tempo liber a duna e tres prome POH nan les di Diabetes y presion halto.
Desde 2016 pa 2017 e proyecto a bira algo oficial, cu a haya les di Hulanda cu na un nivel di HBO a duna les specializa den Diabetes y malesa Cardiovascular. Esaki ta algo grandi pa Aruba, como cu ningun otro isla den Caribe (ni Bonaire ni Curaçao) no tin Praktijk Ondersteuners.
Aruba tabata e prome cu a bin cu e idea aki, y e ta algo cu pa basta tempo ta existi na Hulanda. E modelo di Aruba ta diferencia un tiki na esun di Hulanda.
Director Goeloe pesey ta felicita comunidad henter cu Aruba tin un POH, cu ta dedica cada biaha entre 30 minuut pa 1 ora na cada pashent, pasobra esaki tabata algo cu semper tabata mira cu bo no por haya e atencion full aki di Docter di Cas.
E POH ta controla bo sucu, check bo presion, y e colesterol, y ta guiabo tambe den bo caminda.
Specialmente relaciona cu esaki, e POH lo ta spera publico awe Diasabra 21 di Mei 2022 for di 8:00 am te cu 12:00 pm na Centro Kibrahacha na Piedra Plat.
Lo tin esaki tambe dos siman despues, esta Diasabra dia 4 di juni for di 8’or di mainta pa 12’or na IBiSA San Nicolas (Sportcentrum).
