ORANJESTAD (AAN): Durante siman, director ing. Edwin Jacobs di AZV a tene un conferencia di prensa pa asina duna un informe di e relato financiero 2021, y tambe di e retonan cu tin e siguiente añanan.
E director a elabora extensivamente riba varios cifra manera e desaroyo di cantidad di aseguradonan, e gastonan di cuido, entradanan, e resultado di e “Wave 5 model”, e gastonan di administracion, e diferente specialismonan y e proyecto plan di implementacion 2022.
Cu cifranan su dilanti, ing. Jacobs a mustra cu si tira un bista riba e gastonan di Laboratorio y Docter di Cas.
A sigui elabora riba gastonan di laboratorio unda no a wak mucho cambio, e gastonan ta keda alrededor di 25 miyon Florin pa aña. E gastonan di docter di cas ta compara cu añanan prome ta menos, un reduccion entre otro door di introduccion di Cas di Dokter (HOED).
E formula di HOED, esta mas docter di cas bao di un dak sigur lo sigui stimula pa asina yega na mas dokter di cas. A contrata cu e prome docter di cas via ARU-BIG y tin 4 dokter den opleiding pero asina mes e topico dokter di cas esta haya dokternan di cas ta keda un reto/desafio.
Gastonan relaciona cu COVID: Pa loke ta e gastonan relaciona cu COVID, por menciona cu den 2020 a uza 25.1 miyon Florin y den 2021 esaki tabata 18.3 miyon Florin.
Pues en total, e pandemia di Covid a costa AZV e suma total di 43.4 miyon den 2020 y 2021.
E gastonan den 2021 tabata primordialmente pa hospital, cuido medico den exterior (cuido medico relaciona cu COVID na Bucaramanga) y testnan PCR (di cual e ultimo tin cu worde mira como gastonan ‘negativo’ ya cu tin un palabracion haci cu e sector cu e gastonan aki (“ganashi aki”) mester bay back den cuido).
Specificacion di tur gasto: OE AZV a presenta den un solo tabla e desaroyo di gastonan di 2017 te cu 2021. Tur esnan interesa pa haya sa mas por profundisa den e tabla akibou of pa lesa ful e relato financiero 2021 por bay riba e website di OE AZV; esta www.azv.aw y download e relato financiero 2021 bou di e bloke Relatonan Financiero 2021 den e homepage (scroll abou na bloke Relatonan Financiero).
