Relato anual y estado financiero 2022 di AAA a wordo acorda dor di Minister di Turismo y Salud como representante di e accionistanan

ORANJESTAD (AAN):  Director Internacional di Royal Schiphol Group, Sr. Kjell Kloosterziel a haci un bishita di cortesía na varios grupo di interes.

Durante su bishita, hunto cu CEO di Aruba Airport Authority N.V. (AAA), Sr. Joost Meijs, Sr. Kloosterziel a reuni cu Gobernador di Aruba, Sr. Alfonso Boekhoudt, Prome Minister di Aruba, Sra. Evelyn Wever-Croes, Minister di Turismo y Salud, Sr. Dangui Oduber, e Hunta di Supervision di AAA y e Team di liderasgo di AAA. Tambe el a bishita e sitio di construccion di Gateway 2030, Fase 1A na aeropuerto.

            Durante e combersacionnan tur a expresa y a reconfirma nan satisfaccion cu e cooperacion fructifero durante e ultimo dos decada entre Gobierno di Aruba, Royal Schiphol Group y Aruba Airport, cu a conduci na un compania y operacionnan saludabel den tur aspecto.

            Aruba Airport ta wordo considera dor di esnan den e cooperacion como un infrastructura crucial pa Aruba y e punto di entrada pa Aruba pa miyones di turista y su residentenan.

             Siman pasa AAA su relato anual y estado financiero 2022 a wordo acorda dor di Sr. Dangui Oduber, Minister di Turismo y Salud como representante di e accionistanan di AAA.

            Sr. Dangui Oduber, Minister di Turismo y Salud: “Nos ta satisfecho cu tin un relacion duradero y fuerte y cu e direccion strategico di aeropuerto ta prometedor. AAA a experencia resultado hopi fuerte na 2022 manera describi den e Relato Anual/Estado Financiero 2022. Mi tin confianza den e futuro di aeropuerto y ta keda en espera di mira tur e desaroyonan nobo den 2023.