Premier Wever-Croes:
*Lo publica un link cu tur hende por download
ORANJESTAD (AAN) – Minister Presidente Evelyn Wever-Croes, den conferencia di prensa tocante e Relato Anual 2022 di ministerio di Asuntonan General, a referi na e siguiente tres capitulonan, unda esun di dos ta trata e tema di Innovacion.
El a splica cu e ta papia di e Directie voor Innovatie, cu ta un departamento nobo y cu a bin cune pa percura pa innovacion. Tambe ta duna un recuento di e trabaonan grandi cu a wordo haci na D.I.A (Directie Informatievoorziening en Automatiserin) y un relato sumamente extenso tocante kico tur Futura a haci riba tereno di Innovacion.
E di tres capitulo ta yama “Overheidsorganisaties”. “Nos ta cuminza cu e Departamento di Recurso Humano, y akinan tambe tin hopi grafico y tabelnan cu ta mustra con e cantidad di empleadonan publico a baha, desde cu nos a drenta den Gobierno” e dignatario a señala.
E mandatario a bisa cu esaki ta un reduccion substancial. Na 2017, tabata papia di 4.800 persona, mas of menos. Aworaki ta papia di 4.400 persona. Pues, 400 persona menos cu ta un reduccion di 9%. Esaki ta danki na e plan di maneho di costonan di personal, cu gobierno ta aplica. Tambe ta elabora riba e vut, ademas di Bureau Interne Dienst (BID), Censo, FMA, Hulpbestuurskantoor, asina ta duna informacion di organizacion di gobierno.
E di cuater capitulo ta infrastructura y ordenanza teritorial, unda ta cuminza cu e departamento di DIP. “Y nos ta mira akinan e cifranan. Transparencia ta pone cu bo tin cu comparti cifranan. Nos tin hopi atraso den e departamento aki, pero tambe ta berdad cu nan ta trahando hopi duro, pa purba elimina e atraso aki y yuda tur hende cu ta wardando riba un pida tereno sea pa traha cas, pa planta of pa motibonan comercial”, Minister Presidente a subraya.
El a agrega cu por mira tambe cuanto placa DIP a trece aden cu su trabaonan. Despues tin DLV (Kadaster) cu tur e cifranan y e trabaonan cu nan a haci.
DOW ta bin seguidamente den Capitulo 4, punto 3, cu ta splica exactamente kico DOW a haci, cuanto placa nan a genera, y ta caba cu Dienst Technische Inspectie (DTI) cu e trabaonan cu nan a ehecuta den e ministerio. E relato anual ta finaliza cu un “Voorwitblik” cu ta e miras pa 2023 y kico gobierno ta spera pa e aña aki.
Premier Wever-Croes a indica cu e Jaarverslag 2022 lo wordo entrega, naturalmente, na Parlamento, Gobernador, Biblioteca Nacional pa asina semper e futuro generacionnan por tin un cuadro di referencia. El a reitera cu lo publica un link cu tur hende por download y lesa pa haya tur informacion.
Pa conclui Minister Presidente a expresa palabra du gradicimento na tur hende den su Ministerio cu a yude cu e relato anual 2022, Parlamento y tur departamento cu a duna nan contribucion, pa pone, un biaha mas, por escrito pa futuro generacionnan e referencia con duro e ministerio di asuntonan general ta traha apesar di tur e retonan.
