Lema 2023: “Cu nos, no pa nos”
ORANJESTAD (AAN) – Cada 21 di Maart ta wordo celebra e Dia Mundial di 'Down Syndroom' cu e meta principal di crea consenshi dentro di e sociedad, riba e balor cu e personanan aki tin, no obstante nan discapacidad intelectual.
Tambe, e fecha aki ta pretende reivindica nan aporte na e sociedad, derechonan y independencia pa tuma nan propio decisionnan y crecemento personal.
E Dia Mundial di 'Down Syndroom' ta wordo celebra for di dia 21 di Maart 2012, door di un Decreto estableci pa e Organizacion di Nacionnan Uni (ONU).
A scoge e fecha aki pa motibo di e proceso di division genetico yama Trisomie 21. Dia 21 di e di tres luna di aña pa simboliza e trisomie aki.
Kico ta 'Down Syndroom'?
'Down Syndroom' no ta un malesa, manera hopi hende ta kere.Ta trata di un condicion of trastorno di Chromosome cu ta sosode ora ta aparece un alteracion of material genetic extra, den e chromosome 21.
Segun datonan di ONU e condicion aki ta sosode den 1 di cada 1.100 mucha recien naci.
Ainda no tin un splicacion tocante di con ta existi e material genetic extra den e personanan aki, maske ta wordo sospecha cu por ta debi na un proceso di division defectuoso cu ta duna como resultado un chromosome yama “Trisomie 21”.
E consecuencia mas evidente ta un desaroyo incompleto na nivel cerebral, cu ta provoca discapacidad intelectual y algun trastorno fisico, cu ta afecta e sistema digestivo y tambe ta ocasiona dañonan den e curazon.
Derechonan di personanan cu 'Down Syndroom':
E personanan cu 'Down Syndroom' mester goza di e mesun derechonan, beneficio y privilegio cu mayoria di e personanan den e sociedad actual. Nan derecho na igualdad, oportunidad, felicidad pleno, ta inalienable.
Pa Nacionnan Uni, e Dia Mundial di 'Down Syndroom' ta forma parti di e Agenda 2030, como parti di e plan di accion sostenibel pa proteha e personanan aki contra cualkier tipo di abuso, atropeyo of discriminacion.
Su balor y contribucion pa humanidad no mester ta inferior, no obstante su discapacidad, ya cu a base di trabao, atencion y ayudo nan por wordo incorpora na e bida social, desempeñando actividadnan multiple.
LEMA 2023: Pa aña 2023 e lema di Dia Mundial di 'Down Syndroom' ta
Cu nos, no pa nos”!
