Hose Figaroa di FTA:
ORANJESTAD (AAN): E ta un trend cu a bira notable no djis pa cierto instancianan, sino pa Sindicatonan na Aruba tambe!
President di Sindicato FTA, esta Hose Figaroa a splica cu cerca tur empresa, y den mercado laboral en general, semper lo bay tin keho y situacionnan cu no ta cana bon. E kehonan aki den mundo laboral, en realidad no sa tende di Departamento di Labor riba e cifranan pa asina sa con e kehonan ta desaroya cada aña. Hopi biaha ta tende trahadornan cu ta keha riba e decision na e Departamento ey. Sinembargo tin di corda, cu djis pasobra bo a entrega keho, esey nifica cu automaticamente bo ta bay haya razon.
Pero na Sindicato FTA mes, nan tin un departamento cu ta atende keho. Esey ta debi cu cada keho di miembronan cu drenta na e Sindicato ta wordo trata internamente.
Segun president Figaroa, algo cu ta preocupante ta e reclamo di algun trahador, cu ta bisa cu nan ta acudi na Departamento di Labor y ta keha cu nan no ta haya atencion eynan. Esey si ta algo cu lo tin di wordo coregi.
E cifranan di kehonan cu a drenta na Sindicato FTA tambe ta conoci, y esakinan lo wordo presenta e dianan aki durante e Congreso di Mitar Aña na e miembronan. Nan a haya un total di 160 keho cu a wordo trata den ultimo 6 pa 8 luna na e Sindicato.
Hose Figaroa a indica cu e cifra di 160 keho aki no ta extremadamente hopi, mirando cu nan tin aproximadamente 3.000 miembro. Pero si bo mira e cantidad di empresa (como 80 pa 90 compania), bo por mira cu relativamente e cantidad di keho ta halto.
E porcentahe di mas grandi di keho cu Sindicato FTA ta ricibi, ta bin for di sector hotelero, pero e ta varia hopi. Mayoria ta atende asunto di retiro, suspensionnan, y paketenan cu ta wordo ofreci, etc.
Tambe sa haya keho di empleadonan cu ta haya cu compania no ta cumpli cu e Contract di CAO, of otronan cu ta haya cu pago di A.O. no a bay bon, pago di aniversario, etc.
Pero como miembro di Sindicato, e beneficio ta cu ora bo duna un keho ya bo sa cu bo no ta abo so den e lucha. Bo ta haya un guia riba loke mester haci, y si ta necesario e Sindicato lo para mey-mey di abo y e dunador di trabao tambe.
Hose Figaroa a indica cu mayoria di caso di keho, nan ta logra yega na un solucion, y loke e Sindicato no por logra soluciona riba su mes, ta bay e ora externamente via abogado. El a splica cu mayoria di casonan ta wordo soluciona sin cu mester a recuri na asistencia legal y finaliza dilanti Hues.
Abogado y Hues ta unico solucion ora cu partidonan no por sali afo di cualkier disputa laboral. Pero nan ta purba toch di yega na un solucion pa cualkier problema.
Figaroa ta haya e cifra uno halto, pero e ta manehabel y si bo mira bon, toch Sindicato ta logra soluciona mayoria di problemanan internamente.
