ORANJESTAD (AAN) – Candy Peña, Instructor Deportivo y Coordinador General di IBiSA Camp 2023,
den conferencia di prensa a amplia tocante e campamentonan cu ta bay tuma lugar, tanto na Playa como na San Nicolas, pa nos muchanan den temporada di vacacion grandi.
E campamentonan lo tuma lugar na Santa Cruz, Noord, Savaneta y San Nicolas, di 8’or di mainta pa 12’or di merdia.
E ubicacion lo ta na Centro Deportivo Santa Cruz, Centro Hubenil Washington, Colegio Sagrado Curazon, IBiSA San Nicolas.
“Cada siman nos tin diferente lugar. E aña aki nos a purba di haci hopi fun, unda e muchanan no solamente ta bay pasa e mainta agradable, pero nan por haci deporte, siña diferente actividad y tambe nan ta bay afo, na e pool y tambe ta bay hiking na Parke Arikok”, Candy a menciona.
El a menciona cu ta importante pa e muchanan bin bisti cu paña deportivo, no bin cu short di jeans, keds y slof solamente ora nan bay pool.
Tambe el a indica cu edad di e muchanan participante ta di 6-12 aña. “Nos kier haci enfasis den esaki, pasobra nos no por tin mucha mas grandi cu 12 aña, ni menos di 6 aña, pasobra e ta enfoca pa muchanan di 6 pa 12.
Pa contacto cu e mayornan, nan ta bay ricibi un email, unda nan ta bay haya tur e notificacion y informacion, y cualkier cambio cu por tuma lugar.
“Pero basicamente tur informacion ta bay via email. Asina cu bo ta registra bo yiu di biaha bo ta haya un notificacion cu ta splica tur loke bo yiu mester trece na e camp of tene na cuenta cu cualkier otro detaye”, Candy a agrega.
El a agrega cu manera tur aña lo tin dos instructor pa cada grupo. Nan ta cien mucha cu ta bay parti den cuater grupo. E instructornan ta hendenan specializa cu ta traha cu muchanan. Nan ta bay haya diferente actividad cu e juffrouwnan y e instructornan mes.
Pa loke ta cuminda e muchanan ta bay haya un sandwich tur mainta trempan, fruta, snack na mitad di mainta, nan lo haya ice tee pa bebe y diferente juice. Si e mucha no ta come of bebe di locual IBiSA ta bay provee pa nan, of si nan ta alergico of vegetariano, e ora ey mayornan por pone algo extra pa nan.
