Siguridad di klapchi pa muchanan
ORANJESTAD (AAN): Den algun ora lo scucha e ultimo secondenan di aña 2025. Pa mayoria ciudadano, e tabata un bon aña, cu retonan aki aya, pero manera semper, nos Arubianonan ta cla pa enfrenta cada reto cu determinacion. Pa algun, e aña no tabata di e bon ey. Hopi a sufri perdida di un ser keri, den mayoria caso, inespera.
Mientras cu e aña ta yegando su final, Aruba ta cuminsa tembla cu e zonido caracteristico, klapchi ta kibra e silencio, y anochi colornan luminoso ta dorna nos cielo. Un tradicion, cu ta parce cu ta mara den e DNA cultural di e isla, ora cu holoshi bati 12or, e cielo ta bira un canvas di color di speranza, pa un otro aña prospero, di suerte y oportunidad, pa core cu fucu, manera e bieunan ta bisa.
Pero entre tanto alegria y stof den aire, tin un berdad importante cu nos no por ignora. Na mundo, cada aña miles di mucha ta sufri di kemadura y lesionnan door di e mal uzo di klapchi, distraccion y door di e falta di supervision di adultonan. Hopi desgracianan aki, ta storianan silencioso cu hopi biaha no ta sali na cla mey-mey di tanto celebracion.
Durante añanan, na Aruba, sin embargo, nos no a conoce hopi caso serio di accidente di klapchi manera ta pasa den otro pais. Por ta esaki ta motibo pa nos sinti orguyoso y responsabel. Nos comunidad ta mas consciente y comprometi cu e siguridad di nos muchanan. Laga nos mantene esaki asina.
Di otro banda, mucha ta keda mucha. Y semper mester keda bou di supervision di un adulto ora cu nan ta permiti pa tin y cende klapchi. Laga nos tin prudencia, tur mayor mester establece reglanan y percura cu muchanan ta cumpli cu nan, pa asina cada mucha disfruta di e magia di 2026 sin riesgo ni dolor. Siguridad di nos muchanan ta prioridad. Asina nos ta honra tradicion, y asina nos ta cuida nos muchanan.
Esaki ta un mensahe di DIARIO.
