E realidad di union Venezuela y Colombia den porta di Aruba
*Ocho barco cu fugitivo lo a wordo intercepta dor di armada
*Kico ta spera region cu fracaso di e revolucion di Putin?
ORANJESTAD(AAN)- Mientras comunismo no bira realidad na un pais, ta dificil pa splica ciudadanonan cu Comunismo ta simplemente e mihor formula di dictadura.
Mundo a bira complaciente cu e sistema Comunista, cu despues di caida di Union Sovietico a entrega mundo e impresion cu peliger a pasa.
Rusia tabata haci uzo di inversionnan di placa di paisnan liber, cu a establece nan mes na Rusia despues di caida di Union Sovietico.
Na Rusia nada a cambia realmente cu excepcion di e hecho cu regimennan Ruso a permiti e Ruso cera conoci cu icecream pero no a entrega e Pueblo Ruso e derecho di democracia y di dignidad di un hende cu no ta esclavo di estado.
Esclavo di estado ta e mihor forma pa describi e ciudadano di un dictadura Comunista, cu for di su introduccion na Rusia a splica mundo cu e ta mucho mas cu loke mundo kier yama socialista.
Sin dictadura, comunista no por existi pasobra e horta di hende e derecho di alcansa obhetivanan personal y ta uza esfuerso di e ser humano pa dirigentenan haya loke nan kier.
Vladimir Putin na 2022 a canta un revolucion comunista nobo na un mundo cu a contesta. Pero dia ta pasa, luna ta pasa y ainda e problema no ta soluciona.
Mundo liber ta tene su mes na tur tipo di modelo di democracia y derecho, mientras cu e sistema comunista ta tene su mes na e unico modelo cu e conoce cu ta e modelo di fiera cu ta mata pa e por sigui existi.
Na e momento aki, un situacion sumamente serio ta reina y Putin ta pone presion riba su propio hendenan pa nan drenta ehercito y busca nan morto.
Na Rusia cantidad di ciudadano Ruso ta trata na bandona e pais, mientras Ukraina ayera a mustra cu el a haya mas arma pa defende su mes.
Cu Putin ta landa actualmente den lama bruto, ta algo cu tur hende por mira. E pregunta serio ta, kico lo pasa cu mundo si e revolucion di Putin fracasa y na un forma of otro Putin desaparece for di mapa.
Putin no ta ni e prome ni e ultimo dictador cu mundo a conoce.
Kico a pasa cu tanto dictadura?
Sinembargo cu e dictadura comunista, tin un problema mas. Comunismo no ta un concepto di un solo pais. Den porta di Aruba tin dos pais cu ta bira un forsa comunista peligroso.
No ta na Rusia so refugiadonan ta busca forma pa bandona dictadura y alcansa libertad.
Informacionnan di DIARIO ayera a mustra cu Armada na Colombia a intercepta ocho barco cu 118 refugiado di Venezuela a bordo.
E loke ta pasa na Rusia, ta realidad di Venezuela sigur y lo bira realidad di Colombia na man di un presidente comunista, cu a bira aliado di Nicolas Maduro,
Kico ta bay pasa den porta di Aruba den desaroyonan mundial?
Kico lo pasa si logra baha Vladimir Putin cu ta landa den olanan pisa na su pais?
E decision pa tene e fronteranan cu Venezuela cera, ta hopi importante pa Aruba, caminda publico mester cuminsa presta mas atencion na e resultado directo di e guera di Ukraine cu tin mundo den un inseguridad total!
E aliansa comunista di Venezuela, ta yega mas leu cu e lazo di Putin. Si Putin zink den e olanan cu el a provoca, kico lo pasa cu e cadena comunista, aliado di regimennan sumamente peligroso pa stabilidad mundial?
E hecho cu refugiadonan di paisnan comunista ta aumenta rond mundo, ta papia un palabra cla!
